سواء كنت من عاشقي كرة القدم أو حتى مش على قدر كبير من الاهتمام، هتكون بتتابع لحظات من كأس العالم وخصوصًا الافتتاح، وفي العالم العربي السنة دي العيون كلها متجهة لنا لإن البطولة في قطر، والعالم كله كان مستني حفلة افتتاح مختلفة بتحضر لها قطر من وقت كبير وباستعدادات ضخمة. لو فاتك حفلة الافتتاح، جمعنا لك أهم اللقطات واللحظات اللي حصلت فيه.
كرة صنعت في مصر
من أهم اللقطات اللي حصلت في بطولة كأس العالم السنة دي، إن الكرة اللي هيتلعب بها صناعة مصرية، مصر حضرت المونديال في كل ملاعبه بصناعتها حتى لو فريق المنتخب ماكانش بيحالفه الحظ للمشاركة في البطولة، لكن مصر كانت لها لمسة أصيلة في المونديال.
أغاني الافتتاح
من زمان وأغاني افتتاح الكونديال من أكتر الحاجات اللي بتفضل عايشة وبنفتكر بها البطولة، علشان كده اختيار الأغاني والمغنيين بيكون مهم وتاريخي، والسنة دي شوفنا عرض الافتتاح بفنانين عرب وعالميين ببصمة مشتركة.
“حالمون” توقيع نجم البوب الكوري الجنوبي جونجكوك وعضو فرقة “بي تي إس” جونجكوك والمطرب القطري فهد الكبيسي.
ده غير الأغنية الرسمية للافتتاح، بصوت ميريام فارس ومالوما ونيكي ميناج، والعرض الفني الاستثنائي لها تضمن 50 راقص و50 عازف و30 فني، مع أحدث التقنيات والآلات الموسيقية الشرقية.
تقديم الافتتاح
في الحفل نفسه، شوفنا النجم العالمي مورجان فريمان، وهو بيقدم الافتتاحية الرسمية مع غانم المفتاح، سفير النوايا الحسنة القطري، بلقطة كانت الأكثر تداولًا على السوشيال ميديا، وشهد الحفل تلاوة آيات قرآنية بصوت غانم المفتاح، وده عكس احترام ثقافة الاختلاف اللي العالم كله بينادي بها من خلال بطولة تعتبر الأهم في العالم.
ردود الأفعال عالميًا
الضجة اللي حصلت وردود الأفعال في العالم كله على حفل افتتاح كأس العالم 2022 على أرض قطر كان من أهم اللحظات، لإن ده بيعكس مجهود قامت به قطر علشان البطولة تكون بالشكل المتحضر ده، من أول حفلة الافتتاح والعروض اللي اتقدمت والأغاني، للملاعب المتطورة اللي اتجهزت مخصوص لمباريات المونديال بأحدث تكنولوجيا، والأهم إن السبق في تصميم الملاعب دي كان لدولة عربية.
قطر حريصة على تعظيم مكانتها وإبراز ثقافتها وحصورها عالميًا وإقليميًا، وده اللي قدرت تثبته في أول أيام المونديال على أرضها، وكان حتى أهم من المكاسب المادية اللي بتكون هدف لأي دولة تستضيف بطولة كأس العالم، لإن اللي بيتردد في الصحف العالمية إن قطر صرفت حوالي 200 مليار دولار علشان تستعد لاستضافة المونديال، وده كان بيشمل تجديد وتطوير مرافق الدولة، وده بيعكس الرؤية القطرية للإنجاز ده.