السنة اللي فاتت، شوفنا معرض فني قلب الدنيا في مصر، وصور القطع الفنية مع الأهرامات غرقت السوشيال ميديا والناس بقت تتسابق مين يصور صور أحلى.. ده كان معرض “الأبد هو الآن” اللي عملته “Art d’egypt” والسنة اللي فاتت كانت نسخته الأولى، وبعد النجاح اللي حققه المعرض، السنة دي ابتدى بقوة من نفس الموقع، لكن مع ١٢ فنان وفنانة من مختلف دول العالم، اتجمعوا مع واحدة من عجائب الدنيا السبعة وأقدم الحضارات على كوكب الأرض، بقطع فنية منها اللي معمولة مخصوص علشان تتعرض في الأهرامات وفكرتها الأساسية كانت من الحضارة المصرية.
المعرض موجود لمدة شهر، تقدر تروح طول شهر نوفمبر وتتفرج على القطع الفنية المختلفة اللي بيشارك بها فنانين من مصر والمملكة العربية السعودية والإمارات وتونس وإيطاليا وبريطانيا والسويد وأمريكا وأسبانيا والكاميرون وفرنسا.
في البداية، الدخول للأهرامات فيه تسهيلات كتير لدخول المعرض، كمان في خدمات للزوار مش هتخليك تحس إنك في صحراء، علشان لو بتشيل هم فسحة الأهرامات علشان الحاجات دي في اعتقادك، ماتشيلش هم وروح اتبسط. كمان دلوقتي الجو كويس مش الحر اللي يخليك كاره وجودك في الصحراء، ولا البرد القارس، جو تسمتع فيه بجولة تحت الشمس والسحب الصافية.
جسر بين الحياة والموت
من أكتر القطع الفنية اللي حبيناها في جولتنا في أول يوم في المعرض كانت قطعة معمولة مخصوص للمعرض ده، مخصصة لمنطقة الأهرامات، القطعة كانت للفنان الإيطالي “إيميلي فيرو”.
القطعة اللي سحرتنا دي كانت عبارة عن جسر بين الحياة والموت، بوابة بتدخلك للعالم اللي اعتقد فيه المصريين من قبل الحضارات، تبقى بتتفرج على القطعة الفنية اللي عبارة عن طريق لبوابة، بتوديك على منظر يطل على الأهرامات التلاتة وسامع أصوات مؤثرات تخليك حاسس إنك عايش في أيام الفراعنة أو روحت للوقت ده بآلة زمن.
الهرم الأبيض.. فوتوغرافيا بالمعنى الحديث
الفنان العالمي “JR” أبهرنا في معرض السنة دي بحاجة تجمع بين الحاضر والماضي، صور أبيض وأسود، لكن علشان تطل بتعدي بخطوات مبهرة وجديدة.
أول ما تقرب من الهرم الأبيض ده هتلاقي طابور ناس مستنية تدخل جوا الهرم نفسه، هيدخلوا جوا القطعة الفنية ازاي يعني؟
القطعة الفنية عبارة عن مكان هتتصور فيه جوا الهرم الأبيض، لكن الصورة هتطلع ازاي؟ بتطلع بتكنولوجيا حديثة من جدران الهرم نفسه لبرا، وياخدوها الشباب المنظمين يعلقوها على واجهات مخصصة برا الهرم، يعني تدخل تتصور وصورتك تطلع من الناحية التانية تتعرض برا جنب القطعة الفنية نفسها.
تحت سماء واحدة
مفهوم كبير بيوصف إن العالم كله بيعيش تحت نفس السما وبيتشارك أشياء كتير، قطعة فنية واحدة وصلت للمشاهد كل الشعور ده أحسن من خطبة بآلاف الكلمات.
قطعة “under the same sun” لما تقف قدامها هتشوف نفسك، وتشوف المنظر اللي حواليك من كل الزوايا، ده هيوصل لك معاني كتير لازم تجربها بنفسك، بنوعدك بتجربة مختلفة قدام القطعة دي بالذات، مش بس هتحس إنك عايز تطلع موبايلك وتتصور في الخلفية الجميلة دي، لكن هتنقل لك مفاهيم كتير.
الفن والأبد
الفنانين في النسخة دي من المعرض شايفين رؤى مختلفة، تحت اسم “الأبد هو الآن” في فنانين شايفين إن مستقبل الفن هو اللحظة اللي احنا بنعيشها دلوقتي، وفي شايفين إن مستقبل الفن هو الماضي، لكن كلهم النهارده أجمعوا على إن مصر، وخصوصًا الأهرامات، مصدر إلهام لكل فنان.
المعرض السنة دي ميزته إنه بيتنوع بين فنون مختلفة، مهما اختلف ذوقك هتلاقي في المعرض ده فن يجذبك ويوصل لك رسالة وتحس فيه بشيء.
علشان كده بننصحك تجرّب الفسحة دي حتى من باب التغيير، بدل ما خروجاتنا كلها بقت شبه واحدة، دي فرصة تقابل ناس وثقافات مختلفة تخلّي تفكيرك أوسع، وبنوعدك إنها مش هتكون زيارة تخرج منها بكام صورة حلوين وخلاص، لأ هتقابل فيها مغامرات كتير تساعدك في إنك توسع دايرة تفكيرك.
آخر كلمة: ماتفوتوش قراءة: