مفيش شك إن عيد الحب يوم مميز، وبنحس إن الأجواء مميزة وإن “love is in the air” زيّ ما بنقول! فسواء مع شريك، أو أهل، أو حتى لو هيقضوا الفلانتين لوحدهم، كتير من الفنانين والفنانات بيحبوا يحتفلوا باليوم ده وكمان يهادوا متابعينهم ويعبرلهم عن حبهم وامتنانهم لدعمهم المستمر.. فعيد الحب مش شرط اللي نكون بحبهم دول هما بس للحبيب والحبيبة.. “ممكن يبقى للأخ، الأخت، الصديق، الجار”! مش كده ولا إيه؟ من غير ما نطول عليكم، تعالوا نشوف إزاي الفنانين والفنانات من الوطن العربي احتفلوا باليوم ده..
يوسف الشريف
من أوائل الناس اللي احتفل مع شريكة حياته هو الفنان يوسف الشريف، فاحتفل يوسف مع زوجته في عشاء رومانسي فاخر ونشر الصور بحسابه الشخصي على انستجرام.
يسرا
بالنسبة ليسرا فاختارت إنها في اليوم ده تنشر الوعي عن هدف إنساني وراقي، فنشرت صورة ليها من مبادرة Divine philanthropist، ودعت الكل إنه يحاول يخلي العطاء ومساندة المبادرات جزء من حياته في عيد الحب.
هند صبري
على صعيد كوميدي، اكتفت الفنانة هند صبري، بنشر صورة على خاصية الـ story بالانستجرام، صورة من فيلم أحلى الأوقات، وهي بتقول “عايزة ورد يا إبراهيم”.. اللي هي بقت الراعي الرسمي للسناجل أو البنات اللي مش بيجيلهم ورد في اليوم ده.
هبة مجدي
نشرت الفنانة هبة مجدي صور مع زوجها الفنان محمد محسن من كليب أغنية محسن الرومانسية الجديدة “أهلًا بيك”، اللي ظهرت معاه هبة في الكليب، واتمنت ليه عيد حب سعيد، وكمان نشرت stories مختلفة ليه.
ياسمين رئيس
نشرت الفنانة ياسمين رئيس صورة لنفسها بجاكيت أحمر، وتمنت لمتابعينها إنهم يقضوا عيد حب سعيد.
هند عبدالحليم
نشرت الفنانة هند عبدالحليم صورة رومانسية مع زوجها من يوم فرحهم وغيرهم من الصور المختلفة، ودي كانت طريقتها في إنها تتمنى ليه عيد حب سعيد.
كارول سماحة
في فيديو على البحر في العين السخنة، ظهرت الفنانة كارول سماحة وأغنية رومانسية ليها شغالة في الخلفية، وهي بتتمنى للكل عيد حب سعيد وقالت إن ده مكانها المفضل في الشتاء.
أحمد فهمي
بصورة له مع زوجته، عبر الفنان أحمد فهمي لزوجته الفنانة هنا الزاهد عن حبه، بنشره لصورة ليهم، وكتبلها إنه بيحبها وبيتمنالها عيد حب سعيد.
أحمد فلوكس
ماكتفاش الفنان أحمد فلوكس بإنه ينشر صورة ليه مع زوجته في اليوم ده ويتمنالها فلانتين سعيد، ولكن كمان كتب تعليق كبير على الصورة المنشورة ونصح بيها الأزواج إنهم يتمسكوا ببعض ويتخطوا الأزمات اللي ما بينهم لحياة أجمل وأحلى.
أسماء شريف منير
احتفلت أسماء شريف منير مع بنتها النهارده وعبرتلها عن حبها وإنها الفلانتين اللي هتحتفل بيه كل سنة، وكمان شكرت كل متابعينها على دعمهم المستمر ليها في الأوقات الصعبة.
آخر كلمة: سكوب إمباير بتتمنالكم عيد حب سعيد!