الفترة ما بين فصل الصيف وفصل الشتاء بتكون فترة متقلبة والجو مش مفهوم، أحيانًا درجة الحرارة بتكون عالية وأحيانًا الجو بيرجع يبقى برد مرة تانية. الحالة الغريبة دي بتستمر لشهر مايو، ومعاها بتزيد أدوار البرد جدًا.
وبسبب التقلبات الكتير في درجة الحرارة أدوار البرد بتزيد أوي. ولو ماكانش عندك دور برد حاليًا فأكيد تعرف حد عنده دور برد.
قبل ما نتكلم عن الحاجات اللي ممكن نعملها علشان نتجنب أدوار البرد لازم نعرف الفرق ما بين دور البرد الفيروسي “الإنفلونزا” ودور البرد البكتيري “التهاب الجهاز التنفسي”.
لما أنسجة الجهاز التنفسي بتتعرض لدرجة حرارة منخفضة لفترات طويلة “لما بتبرد” بتقل فعالية الجهاز المناعي وده بيخلي الأنسجة عرضة للالتهابات اللي بتسببها البكتيريا الموجودة في جسمنا بصورة طبيعية.
أما الإنفلونزا فبتيجي بسبب فيروس الإنفلونزا اللي بيعيش في درجات الحرارة المنخفضة “البرد” وأعراض الإنفلونزا بتكون مختلفة عن أعراض البرد في وجود الرشح في الأنف.
طيب نقدر نعمل إيه علشان نتجنب أدوار البرد والإنفلونزا في الجو المتقلب ده؟
1 – بلاش نلبس لبس خفيف
طبعًا كلنا زهقنا من لبس الشتاء وأول ما حسينا إن الجو بقي حر سيكا خلاص بقى عايزين نقلع لبس الشتاء ونطلع لبس الصيف اللي وحشنا ونلبس.
بس ده غلط لإن درجات الحرارة عمالة تطلع وتنزل وكده هنتعرض للبرد وهنعيا، الحل بقى إنك تفضل لابس لبس تقيل شوية لحد ما الجو يظبط وتتحمل الحر، أو إنك تخلي معاك جاكت قطن طول الوقت وتلبسه أول ما تحس الجو بقى برد.
2 – أول ما تحس بأعراض أدوار البرد خد مسكن خفيف ونام
دايمًا بنحس بالإنفلونزا في زورنا. بيبدأ إحساس بسيط بالحكة فبنعرف إنه خلاص هيجيلنا أنفلونزا أو برد فبناخد اتنين بنادول وننام.
البنادول مسكن خفيف والمسكنات بتقلل الالتهاب فده هيخلص المشكلة من الأول، ولو دور البرد استمر هيخلي الأعراض أقل بكتير، لإن معظم أعراض البرد بتكون بسبب الالتهابات اللي بتحصل في أنسجة الجهاز التنفسي.
3 – اشرب حاجات سخنة فيها زيوت طيارة كتير
الزيوت الطيارة هي الريحة اللي في مشروبات زيّ الينسون والنعناع والقرفة وكده. المشروبات دي هتزود نسبة المياه في جسمك ودرجة الحرارة الدافية هتقلل أي تهيج ممكن يسبب التهاب في الصدر.
وكمان الزيوت الطيارة تعتبر أهم مادة طبيعية بتحارب الالتهاب وبتهدي الجهاز العصبي وبتساعدك تنام، والنوم مهم جدًا في عملية الشفاء من أدوار البرد.
4 – بلاش تشغل التكييف الأيام دي، أو لو مضطر تشغله اتغطى كويس علشان تتجنب أدوار البرد
من الأفضل إنك ماتشغلش التكييف وانت نايم قبل نص شهر يونيو، علشان الجو بيبقى برد أوي بالليل وانت بتكون نايم ومش بتحس بده أوي. ولو لازم تشغل التكييف، اتأكد إنك متغطي كويس علشان ماتبردش وانت نايم.
5 – تجنب الخروج في شمس الظهر أو العصر الشديدة
درجة حرارة الشمس بتبقى عالية جدًا في الوقت ده وبتخسر كمية كبيرة من السوائل اللي موجودة في جسمك وده هيخلي درجة حرارة جسمك تعلى بسرعة كبيرة، ولو حتى ده ماكانش سبب في أدوار البرد، فممكن يسبب ضربة شمس، وضربات الشمس خطيرة جدًا.
لو مضطر تخرج في الوقت ده اتأكد إن معاك مياه طول الوقت وتجنب الشمس المباشرة على قد ما تقدر.
وعمومًا، لازم يكون معاك مياه طول الوقت سواء صيف أو شتاء. المياه بتخلي جسمك يشتغل أحسن ومناعتك بتبقى أقوى وتعرضك للأمراض بيقل كتير جدًا.
6 – البس الكمامة في الأماكن العامة
أي مكان في زحمة لازم تلبس فيه الكمامة، علشان العالم لسه بيعاني من أزمة الكورونا وكمان معظم الناس اليومين دول عندها أنفلونزا فالكمامة هتحميك من حاجات كتير جدًا.