أصدر الفنان محمد رمضان أغنية دويتو جديدة بعنوان “يا حبيبي” مع مغني الراب الفرنسي ميتر جيمس اللي أصدر أعمال كتيرة مع فنانيين عالميين كبار زي سيا، وليل وين، وبيتبول، وستينج، وستروماي، وغيرهم. وقال جيمس إنه اختار العمل مع محمد رمضان لأنه بيقدره كفنان وكإنسان، وأنه فنان موهوب جداً.
الأغنية متصورة في دبي بالإمارات، وحققت أكتر من مليون مشاهدة في أقل من يوم. وقررت منصة سبوتيفاي أنها تعمل حملة دعائية للأغنية، وهتحط صورة محمد رمضان وميتر جيمس في ميدان تايمز سكوير بنيويورك، وعلى أكبر شاشة LAD على طريق الملك القديم في جدة.
رمضان أخد مؤخرًا التأشيرة الذهبية للإمارات العربية المتحدة، وهي تأشيرة إقامة في دولة الإمارات لمدة 10 سنين، وأهدته حكومة دبي هاتف ذكي من الذهب محفور عليه اسمه، وعبر عن امتنانه على ستوري انستجرام بيشكر فيها الخليفة.
وبالرغم من إن محمد رمضان دخل مجال الغناء من سنين قليلة، أغلب اغانيه حققت انتشار كبير بمجرد نزولها على السوشيال ميديا، ومن أنجح أغانيه، أقوى كارت في مصر، ونامبر وان، ومافيا، وأنا اللهو الخفي مع الفنان العالمي فاندام، وإنساي مع سعد لمجرد.
ظروف الكورونا والتباعد الاجتماعي مأثرتش خالص على نشاط محمد رمضان في 2020، وأصدر أغاني كتيرة على مدار السنة بداية من “رايحين نسهر بام بام” اللي نزلت في شهر يناير، وقلبت الدنيا وقتها وبقينا نسمعها في كل مكان، خصوصًا في الأفراح.
ورمضان مش بيسيب أي مناسبة مهمة إلا لما يحط بصمته فيها حتى عيد الأم اللي نزل فيه أغنية “أمي ملكة” وظهرت والدته معاه في الفيديو كليب.
وأبنه ظهر معاه في أغنية “كورونا فيرس” اللي نزلت بعد انتشار فيروس الكورونا، وكان فيها توعية ضد الفيروس بس على طريقة محمد رمضان.
وأخيرًا “تيكتوك” اللي نزلت من أقل من شهرين مع النجم الأمريكي سوبر ساكو اللي اتصورت بين مصر وأمريكا، وحققت نجاح كبير على التيكتوك وبقيت السوشيل ميديا.
آخر كلمة: لو لسة ماسمعتوش الأغنية، اسمعوها دلوقتي. وشاركونا بأكتر أغنية بتحبوها لمحمد رمضان في التعليقات…