حدث عالمي بيتضاف لتاريخ مصر بتشهده محافظة الأقصر وبالتحديد معبد حتشبسوت، حدث بيبرز قدرة مصر إنها تستقبل وتستضيف أحداث عالمية، وبيتوج شكل مصر السياحي وبيضيف عليها عظمة في عيون العالم بعد موكب المومياوات واحتفالات طريق الكباش. بحفاوة كبيرة ومع أكتر من 30 طائرة شارتر على أرض مطار الأقصر فيها سياسيين وفنانين ومصممين أزياء ورؤساء تحرير وسياح، من كل حتة في العالم، اختار “ستيفانو ريتشي” المصمم العالمي الأقصر علشان تكون مرحلة مميزة في تاريخ عروضه وقرر إنه يحتفل باليوبيل الفضلي لدار الأزياء بتاعته على أرض مصر من خلال عرض أزياء مستوحي من الحضارة المصرية القديمة.
ستيفانو ريتشي هو مصمم فلورنسي عالمي، أسس شركة STEFANO RICCI هو وزوجته كلوديا، من 1972 بفلسفة 100% تحت عنوان صنع في إيطاليا. الشركة دي رائدة في مجال الملابس الرجالية الفاخرة والإكسسوارات عالية الجودة، وعندهم كمان خط أطفال”SR Junior”.
ستيفانو ريتشي علق على اختياره معبد الملكة حتشبسوت لاستضافتها احتفال الدار بيوبيلها الفضي، وقال على صفحته على الفيس بوك: “حياة الإنسان مليانة بالأحلام، ودي بالنسبة لي تجربة فريدة، أنا اخترت الاحتفال بالذكرى الخمسين لعلامتي التجارية في مدينة رائعة مليانة بالسحر والفن والتقاليد زيّ الأقصر، طيبة القديمة، أرض الفراعنة، وللمرة الأولى في التاريخ، هيكون معبد الملكة حتشبسوت هو المحطة والمرحلة المميزة اللي هعرض فيها أعمالي”.
الاحتفالات بدأت من امبارح، والعارضين بدأوا يخرجوا من جوانب المعبد في مشهد مهيب ومبهر، وحواليهم تماثيل الملكة حتشبسوت في وسط أضواء المعبد، والحفلة كانت على الأنغام الأوبرالية للعالمي “أندريا بوتشيلي”، وبعدها قام استيفانو ريتشي بتحية الحضور، وشكر الحكومة المصرية على حفاوة الاستقبال، والاحتفالية المفروض هتكمل النهارده بزيارة معبد “هابو” وعدد من المزارات بوادي الملوك، منها مقابر الفرعون الذهبي توت عنخ آمون ونفرتاري.
ليه تم اختيار الأقصر بالتحديد لاستضافة الحدث؟
الدكتور “محمد عبد البديع” رئيس الإدارة المركزية لآثار مصر العليا، قال إن الاحتفالية بدأت بعرض أزياء لآخر تصميمات المصمم العالمي، واللي استوحاها من الحضارة المصرية، وغلب عليها اللون الذهبي والألوان المستوحاة من المعابد والقطع الفرعونية المذهبة، واللون الأزرق بلون النيل ونقوش المعابد.
والدكتور “مصطفى وزيري”، أمين عام المجلس الأعلى للآثار المصرية، علق على الحدث وقال: “اختيار دار ستيفانو ريتشي لمصر ولمعابد الأقصر ماكانش وليد الصدفة، لإنه قرار بيرجع لخلفيات وحقائق تاريخية، وده لإن عرض الأزياء “الفاشون” بدأ من مصر القديمة، اللي عرفت فنون الأزياء، والشياكة والذوق والملابس الراقية، من آلاف السنين”.
وفي دراسة أثرية اتعملت بمناسبة استضافة الحدث الضخم ده، لأيمن أبو زيد، رئيس الجمعية المصرية للتنمية السياحية والأثرية، قال فيها إن مصر من أول الحضارات اللي اهتمت بالأزياء في التاريخ، وأنماط الموضة في مصر القديمة اتعددت على حسب المكانة الاجتماعية والحقب الزمنية المختلفة، وده ظهر من خلال الرسومات اللي سابها الفنان المصري القديم على جدران المعابد والمقابر، وشوفنا من خلال النقوش والرسوم ملابس الأسرة المالكة من الملوك والملكات، بأشكال وخامات مختلفة، واللي بتبين لنا تقدم ورقي واضح فى عالم الموضة فى مصر القديمة.
والدراسة أشارت كمان إن في اقتباسات كتير من المهتمين بالموضة على مستوى العالم من تصميمات مصرية قديمة، وإن في مصممين كبار بييجوا لزيارة مقبرة نفرتاري ومقابر ملكات مصر، علشان يستلهموا أفكار جديدة لتصميماتهم من الحضارة المصرية القديمة.