الحرف اليدوية المصرية من أقدم وأجمل الحرف، مفيش مرة هتروح مكان ومايلفتش انتباهك وجود مصنوعات يدوية تخطف عينك غير أي منتجات تانية، وعلشان نزود الاهتمام بأهم حرف في مصر وتاريخها وتراثها، وزارة التضامن الاجتماعي بتنظم معرض ديارنا في نسخته الـ 61، في الفترة من 15 لـ 25 فبراير يوميًا من الساعة 10 الصبح للساعة 10 بليل في كايرو فيستيفال سيتي، وديارنا بيعتبر أهم وأقدم معارض الحرف التراثية في مصر.
المعرض بيعتمد على أعمال الأسر المنتجة اللي من كل إقليم في مصر، من سيناء للنوبة للفيوم، وبيشتغلوا على منتجات بتعبر عن تراثهم وثقافتهم في كل محافظة، بنلاقي أبناء الأسر دي بيتعلموا الحرف من أمهاتهم، وبيفرحوا بالمنتجات اللي من صنع ايديهم، في وسط ما العالم كله بيتوسع في الميكنة، إحنا لسه عندنا منتجات يدوية مصنوعة بحب، وعلشان كده المعرض اتسمى “مصر بتتكلم حرفي”.
الديكور الخاص بالمعرض معمول بالخط الكوفي العربي، وبيتعرض فيه تحف نادرة، من أعمال خزف ونحاس وكشمير وإكسسوارات، وكمان منهم اللي اتعمل نتيجة عملية تدوير المخلفات بشكل رائع، المعرض بيشارك فيه 1500 عارض، مع لفتة جميلة بمشاركة عدد من اللاجئين والغارمات اللي اتوفرتلهم فرصة الرجوع للأسواق مرة تانية من خلال المعرض.
وبالرغم من الظروف الجوية المتقلبة اليومين دول، والطقس البارد اللي مسيطر دلوقتي، إلا إن الإقبال على المعرض كبير والناس مهتمة بزيارته، كمان مع المحافظة على كل الإجراءات الاحترازية لتجنب العدوى بفيروس كورونا.
