العالم بيشهد دلوقتي اهتمام بمدينة شرم الشيخ كمركز سياحي مهم في مصر والشرق الأوسط، في وقت استضافة مؤتمر المناخ كوب 27، وخصوصًا إن مصر بتتمتع بأنواع مختلفة من السياحة، دلوقتي في اهتمام بنوع من السياحة ماكانش معروف لكل الناس، وهي سياحة مشاهدة هجرة الطيور.
مدينة شرم الشيخ عندها استعداد للنوع ده من السياحة، والدولة حاليًا بتهتم بمراكز الطيور المهاجرة في المدينة علشان يتم تطوير السياحة دي في مصر والاستفادة منها، لإنها انتشرت في الفترة الأخيرة عالميًا.
النوع ده من السياحة بيعتمد على إن مجموعات السياح بتتوجه للمناطق اللي بتتركز فيها الطيور، لرصدها وتأملها، وبتتنظم الرحلات دي طول السنة لكن بتنشط أكتر في فترات هجرة الطيور، ومصر تعتبر محطة رئيسية لأنواع كتير من الطيور بتكون جاية من أوروبا وفي طريقها لأفريقيا.
اللجنة المصرية لتسجيلات الطيور النادرة في تقريرها الأخير، قالت إن عدد أنواع الطيور الموجودة في مصر حوالي 482 نوع، والتقرير بيتحدث كل سنة بأي أنواع جديدة يرصدها المراقبين، سواء كانوا مصريين أو أجانب.
مسارات وأوقات الهجرة
مصر تعتبر تاني أهم مسار للطيور المهاجرة الحوامة في العالم، لإنها بتتوافد بأعداد كثيفة في فصل الخريف خلال رحلتها من أوروبا للمناطق الدافئة اللي بتستقر فيها أثناء فصل الشتاء، وده بيتزامن مع الوقت اللي فيه العالم كله بيشوف شرم الشيخ ويعرف عنها، وكمان في الفصل اللي بتنشط فيه حركة الطيور في مصر.
في الفترة دي، بتنطلق الطيور المهاجرة في الخريف من مناطق التكاثر في أوروبا وغرب آسيا لشمال وسط أفريقيا، لإنها مناطق دافئة، وبيرجعوا يهاجروا تاني في الربيع هجرة عكسية، وتقدر تشوف أعداد كبيرة من الطيور المهاجرة في جنوب سيناء وشرم الشيخ.
اهتمام وزارة البيئة
وزيرة البيئة، قالت في زيارة سابقة لمراكز هجرة الطيور، إن السياحة البيئية لا تقتصر على القيام بالأنشطة البحرية، لكن بتشمل عدد من الأنشطة المتنوعة، ومنها مشاهدة الحفريات بالمحميات والاطلاع على ثقافات وأنشطة المجتمعات المحلية من خلال رحلات السفاري، ومصر بتتمتع بالمقومات دي، ده غير أهم أنشطة السياحة البيئية في العالم وهي مشاهدة الطيور، واللي قامت عليها اقتصاديات كتير من الدول.
ووقتها كمان استعرضت وزيرة البيئة عدد من جهود مصر في مجال حماية الطيور المهاجرة للوفاء بالتزاماتها الدولية، و حفاظًا على التنوع البيولوجي، ومنها برامج إغلاق محطات توليد طاقة الرياح عند عبور الطيور لحمايتها، بالتعاون مع هيئة الطاقة الجديدة والمتجددة، وبرامج التوعية للمرشدين السياحيين بالطيور وأنواعها، وبرامج مختلفة خلّت مشاهدة الطيور واحد من أهم البرامج السياحية الأساسية، بالتعاون ما بين وزارة البيئة ووزارة السياحة وهيئة تنشيط السياحة، فمشاهدة الطيور هيكون أحد البرامج اللي هيتم دمجها في السياحة البيئية.