بعد الديب: نجوم هنشوفها قريبًا على المنصات الإلكترونية

في الفترة الأخيرة شوفنا حاجة زيّ الاكتساح لمنصات رقمية قررت تعرض مسلسلات بشكل حصري، تجربة فنية اتكررت أكتر من مرة في فترة زمنية صغيرة، بس عملت صدى حلو ونجاح كبير، وساهمت في تطور المحتوى الفني نفسه، لإن المسلسلات بتبقى معظم حلقاتها ماتتعداش الـعشر حلقات، فبيساعد بشكل كبير في جودة المحتوى اللي بيتقدم وأداء النجوم فيه كمان.

ويمكن شوفنا تجربة من قريب وكانت ناجحة على كل الأصعدة، مسلسل “نمرة اتنين” اللي شارك فيه أكتر من 8 نجوم ومخرجين، وكان جرعة فنية من العيار التقيل، بعيدة عن التطويل في الأحداث بدون داعي. وفي الأيام دي شوفنا أكتر مسلسل بيتجهز علشان ينزل على المنصات، منهم اللي نزل البرومو بتاعه، ومنهم اللي لسه في مرحلة التصوير.

نجوم متحمسين نشوفها على المنصات الإلكترونية

ياسر جلال

مسلسل من إنتاج شركة سينرجي، اقتحم من خلاله ياسر جلال منطقة الرعب لأول مرة، ظهر في البرومو في صورة شحص بيتحول لذئب، المسلسل من 8 حلقات وهيتعرض على منصة Watch It من إخراج نادر جلال.

دينا الشربيني

مسلسل الزيارة بطولة دينا الشربيني وتقلا شمعون وكارول عبود وعبده شاهين، وهيتعرض على منصة شاهد، والسيناريو من ورشة كتابة تحت إشراف مريم نعوم ومن إخراج أدفولو مارتينيز، المسلسل مكون من 8 حلقات بيتكلم عن حكاية إنصاف اللي هتسافر من القاهرة لبيروت سنة 1981 علشان تقضي على لعنة في بيت عائلة حداد.

ياسمين رئيس

مسلسل 60 دقيقة من 9 حلقات، بطولة ياسمين رئيس وأحمد السعدني وسوسن بدر وشيرين رضا، بتدور أحداثه في قالب من الإثارة والتشويق، هيتعرض على منصة شاهد ومن بعدها على قنوات Mbc، وتعتبر دي تاني تجربة درامية لياسمين بعد مسلسل ملوك الجدعنة.

هند صبري

المسلسل اللي عمل ضجة من مجرد الإعلان عنه، وناس كتير مستنياه منه “البحث عن علا”، من المفترض إنه هيتعرض على منصة نتفليكس، من تأليف غادة عبد العال وهيشارك هند صبري في البطولة مجموعة من النجوم منهم: سوسن بدر وهاني عادل وندى موسى، ولسه لحد دلوقتي لم يتم الإعلان عن ميعاد طرحه الأخير.

أخر كلمة: ماتفوتوش قراءة: البحث عن علا: ليه بعد 11 سنة لسه متحمسين للجزء التاني من “عايزة أتجوز”؟

تعليقات
Loading...