كل يوم بنقابل ناس في حياتنا، بنخرج في علاقات وبندخل في التانية، بس في علامات بتظهر وأنت في نص الطريق بتقولك “اهرب” أنت مش مع الشخص الصح، أو مش في العلاقة الصح، ببساطة “أنت في علاقة مسمومة”. ولإن مش كل الناس تقدر تفهم العلامات دي، جمعناهالكم علشان تاخد بالك وماتضيعش عمرك وأنت بتزق في حيطة “هتقع”.
يقللوا منكم قدام الناس
نوعية الناس دي بتتعمد تكسفك قدام الناس، وتطلعك مش بتفهم حاجة، وشخصيات زيّ دول، بتفقد الثقة في نفسك معاهم.
الأذى الجسدي
إن الشخص اللي معاك يكون بيتطاول عليك بالأيد وبعدين يبرر ده تحت مسمى “الحب”، ده يعتبر أقذر استغلال لإن مفيش حاجة اسمها “أذى” تحت مسمى الحب، وخصوصًا إن الموضوع مش بيقف بس عند الأذى الجسدي، لأ ده بيجيب معاه مشاكل نفسية تفضل تعالج فيها طول حياتك.
إنهم ياخدوا ومايدوش
في أي علاقة بين طرفين حتى لو علاقة “صداقة” مش شرط حب، لازم الاتنين يقدموا حاجات علشان الدنيا تمشي، سواء بيقدم تنازل أو اهتمام، فلو كنت بتدي كل حاجة من غير ما تلاقي أي مقابل معنوي، فاعتبر إنك في Toxic relationship.
مفيش دعم نفسي
لو ماقدموش كل الدعم والتشجيع اللي في الدنيا، سيبوهم! الناس في العموم بتحب تدخل في علاقات علشان تلاقي حد يدعمها معنويًا وتكمل حتة ناقصة عندها، فلو مالقتش اللي معاك مش عايز يشوفك أحسن وعايزك تفضل مكانك، أحسنلك تمشي!
بيجرحك بالكلام
بتلاقي الشخص اللي معاك في علاقة مسمومة بيقولك دايمًا كلام يجرح أو يضايق، حاجات ممكن تتحط تحت اسم “التنمر” بس مش المفروض تتقال من شخص أنت وهو في علاقة، لإن أساس العلاقات إنها بتقوم على “الحب والاحترام”.
مفيش إحساس بالأمان
من الأساسيات اللي بتتبني عليها أي علاقة واللي بسببها بنحب نبقى في علاقة أصلًا هو “الأمان”، من غيره العلاقة بتبقى”مخوخة” وممكن تتهد في ثانية. إن الشخص ده ممكن يسيبك أو يبدلك ده أسوأ إحساس.
غير كل دول بقى، لما تكون نتايج العلاقة دي جاية عليك بإحباط وعدم راحة، ولما تفقد إحساسك بسلامك النفسي، ولما يخليك تنعزل عن العالم كله حتى أهلك، ولما تتنازل عن أحلامك بسببه، كل ده يعني أنت مع الشخص الغلط.