لسه مافاقتش لبنان من حادثة انفجار المرفأ واللي راح بسببه ضحايا كتير ولسه لحد دلوقتي البلد بتعاني من تبعاته وتأثيراته الاقتصادية، وصحيت امبارح على حادثة انفجار جديدة لخزان محروقات في بلدة تليل بعكار شمال لبنان، واللي راح ضحيته أكتر من 22 شخص وإصابة 79 مواطن. وللسبب ده قررت إدارة حفل الموريكس دور إنها تؤجل الحفلة حدادًا على الفترة الصعبة اللي بتمر بيها لبنان.
والحفل كان من المقرر إنه يتعمل يوم الأربع 18 أغسطس في دورته العشرين وكان هيبقى تحت شعار “الأمل رغم الألم” لبيروت أيقونة الصمود، وإعلان التأجيل ده جيه بعد مجموعة من الاعتذارات قدمها الفنانين في الساعات الأخيرة اللي فاتت بعد حادثة الانفجار.
صدر عن مؤسسي جائزة موركس دور الطبيبين زاهي وفادي الحلو البيان الآتي:
— Murex D’or (@murexdor) August 15, 2021
“بعد الفاجعة الجديدة التي ألمت بوطننا لبنان والتي تمثلت بالانفجار في بلدة التليل العكارية والذي أودى بحياة العشرات من القتلى والجرحى، قررت لجنة الموركس دور إرجاء الحفل الذي كان مقرراً أن يقام مساء الاربعاء… pic.twitter.com/EuVGiymL3R
وكان من ضمنهم الفنان قصي خولي واللي نشر تغريدة على صفحته، ونعى فيها الأوضاع اللي بتمر بيها لبنان وسوريا، وكان من قبله شركة “سيدرز آرت برودكشن” اللي كان من المفترض إنه يتم تكريمها على مسيرتها الفنية والمعروفين باسم “الصباح إخوان” واللي بيمتلكوا أكتر من نص إنتاج الأعمال اللي بتتعرض على القنوات.
واعتذرت برضه الفنانة ماغي بوغصن وتوالت الاعتذارات من الفنانين زيّ نوال الزغبي ودانيلا رحمة وكارول عبود والمخرج الكبير فيليب أسمر وقالوا إن بيروت بتمر بظروف استثنائية وده وقت الصمت والحزن اللي بنعيشه مش وقت أفراح، بس ده مش هيطول وهنرجع نحتفل قريب بولادة لبنان الجديدة.
بندعي كلنا إن لبنان تعدي من أزمتها على خير، وماتطولش أكتر من كده، وترجع من تاني تدب بيها الحياة والروح والفرح.