في إطار دعم المرأة وتمكينها، أصدر الدكتور مصطفى مدبولي قرار بينص على إنشاء وحدة تحت عنوان “الوحدة المجمعة لحماية المرأة من العنف” تحت مسئولية مجلس الوزراء وهيكون مقرها الرئيسي في نطاق القاهرة الكبرى وممكن بعد كده يتم تعميمها على كل محافظات مصر.. طب إيه الوحدة دي وازاي ممكن تساعد المرأة؟
الوحدة دي هيكون هدفها الأساسي هو استقبال الشكاوي والبلاغات اللي ليها علاقة بقضايا العنف ضد المرأة. وده هيبقى عن طريق ممثلين من وزارات وهيئات معنية بالوحدة، علشان يفحصوا الشكاوي ويتصرفوا فيها.. يعني دلوقتي تقدر الست بكل بساطة لو اتعرضت للتحرش أو الاغتصاب أو أي عنف أسري، إنها تروح على مكان واحد بس وتقدم فيه البلاغ، والممثلين من الوزارات والهيئات المعنية هيكملوا كل الإجراءات.
وده هيوفر على الست مجهود بدني ونفسي كبير كانت بتعمله قبل كده، في إنها تروح للشرطة تقدم بلاغ وبعدها الطب الشرعي وبعدها تطلع على النيابة في حالة تعرضها للاغتصاب أو أي شكل من أشكال العنف، لأ هي دلوقتي تقدر تعمل كل ده من مكان واحد، لإن موجود فيه كل ممثلين من كل الوزرات والهيئات اللي هيساعدوها إنها تخلص كل الورق اللي محتاجاه علشان تثبت حقها.
ده غير إن الوحدة دي هتعمل تنسيق مع جهات تانية علشان يوفروا للضحية إقامة مؤقتة مناسبة خلال إجراء التحقيقات، الوحدة نقدر نقول عليها إنها عبارة عن مجموعة متكاملة أشبه بـ”مجمع” هيضم مسئولين من وزارة العدل والداخلية والصحة والتضامن الاجتماعي ومجلس حقوق المرأة وممثلين من النيابة العامة.. الوحدة المجمعة تعتبر إضافة وانتصار جديد ومهم للمرأة علشان نحافظ على حقوقها من غير ما نسبب لها أي عوائق تمنعها في إنها تكمل طريقها.
تمكين المرأة ماكانش بس في مشاريع زيّ دي، لأ ده على مستوى الشغل كان في خطوات مهمة لصالح المرأة، وكانت أول مرة تتعمل لها علشان تدخل كل الميادين بحرية، وكان من ضمنهم مشروع قومي لتمكينها اقتصاديًا وفرص للشغل أكتر في المناصب المهمة في الدولة، وعلى مستوى الاهتمام بصحتها كان في أكتر من مبادرة من ضمنهم الكشف المبكر عن سرطان الثدي. كلها خطوات إيجابية وبتنتصر للمرأة وتستحق التقدير والدعم ومستنيين نشوف حاجات أكتر الفترة اللي جاية.