المسكنات أول حاجة بنجري عليها أول لما نحس بشوية تعب أو إرهاق، في حالات بنضطر لاستخدامها لإن الألم بيبقى فوق طاقة إننا نستحمله، لكن المشكلة مش في اللي بياخده لسبب طبي، التأثير الحقيقي بيبقى على الأشخاص اللي بيعتبروها زيّ الـPop Corn واللبان والبونبوني، وبياخدوها من غير حتى استشارة الدكتور، ومش عارفين كمية الضرر اللي ممكن يقع على صحتهم وجسمهم، ومن ضمن الأضرار السلبية للمسكنات:
- لو اتاخدت على معدة فاضية، ممكن يحصل التهابات حادة في المعدة وآلام مبرحة.
- الأسبرين لو اتاخد على المدى الطويل ممكن يوصل لنزيف في المعدة، وتقرحات فيها، ولو تم استهلاكه بشكل كبير، بيعمل تلف في الكلى ودي أعلى مراحل التأثير السلبي.
- ممكن تأثر على السيدة الحامل وتزود فرص الإجهاض.
- الإفراط في بعض أنواعها بيسبب مشاكل في الأوعية الدموية والقلب.
ومؤخرًا شوفنا أكتر من ضحية للإفراط في المسكنات وكان منهم المذيعة أسماء مصطفى، واللي نشرت على صفتحها تحذير، بعد إصابتها في سرطان في المعدة.
أضرار كتير ممكن تسببها المسكنات لو ماتاخدتش بحذر، وممكن تبقى غير ضارة لو أخدت أنواع معينة خفيفة على المعدة، وعلى فترات متباعدة وتحت استشارة الدكتور، وأهم حاجة مايكونش عندك أي مشكلة في المعدة، وممكن نلجأ لطرق طبيعية كتيرة لتسكين الألم، زيّ مثلًا الأعشاب الطبيعية، وبعض التمارين الرياضية اللي ممكن تتعمل، وأحيانًا المساج بيعمل تخفيف لأي ألم جسدي. وده اللي أكدته دراسة أمريكية.