مصرف الإمارات المركزي أعلن عن أهم توجهاته الاستراجيبة في الفترة ما بين 2023 – 2026، واللي من ضمنها سعي المصرف إنه يبقى ضمن أفضل 10 مصارف ذكية في العالم، والتوجهات دي بتشمل 7 أهداف أعلنها النهارده على موقعه الإلكتروني، ومن ضمنها إصدار عملة رقمية، ودعم التحول الرقمي في قطاع الخدمات المالية في الإمارات بشكل عام.
وده عن طريق إنهم يتبعوا أحدث التكنولوجيا في الذكاء الاصطناعي والبيانات الضخمة، وبتشمل برضه الاستراتيجية دي استخدام التكنولوجيا في أي نظام رقابي أو تأميني، ده غير استخدام البنية التحتية للهوية الرقمية، وتعزيز الشمول المالي علشان يقدروا يوصلوا للخدمات المالية بشكل أحسن وأسرع.
وبتستهدف برضه الاستراتيجية تطوير بنية تحتية مالية قوية لخدمات القطاع المالي وقطاع التأمين. وحدد المصرف المركزي تاريخ 15 يوليو اللي جاي، علشان الشركاء يتعاونوا في الدراسة اللي أطلقها المصرف تحت عنوان “التوقعات والاحتياجات المستقبلية للشركاء”
والسبب الحقيقي ورا قيام المصرف المركزي بالدراسة دي، لإنها بتساند وبتدعم جهود الدولة ودورها في تحقيق أهداف مئوية الإمارات لسنة 2071، علشان تصبح الأفضل عالميًا.
وفي الحقيقة الإمارات بتحاول في كل خطوة بتاخدها، تثبتلنا إنها تستحق فعلًا تبقى من أفضل الدول في العالم، وأخرهم لما قررت إنها تدي الإقامة الذهبية للمتفوقين من الثانوية العامة وأهلهم.