في أكتر من فئة بيندرج تحتها مفهوم الاكتئاب، زيّ ما في اكتئاب ما بعد الصدمة واكتئاب ما بعد الولادة، هنلاقي برضه ما يسمى اكتئاب ما بعد الأجازة الطويلة، يمكن ناس كتير ماتعرفش النوع ده تحديدًا من الاكتئاب، وممكن يكون عدى عليها وماقدرتش تصنف الإحساس ده أو سببه، علشان كده لازم يبقى في توعية بالنوع ده من الاكتئاب وازاي نتعامل معاه.
الاكتئاب ده بييجي بعد فترة كبيرة من الراحة بتكون بعيد فيها عن الشغل أو أي ضغط، وفجأة بيحصل لما بترجع من تاني لحياة الشغل والصحيان البدري والمسئوليات وبيبقى اسمها Back To Work Blues، وبتقعد تعمل مقارنة بين حياتك في الأجازة سواء كانت سفر أو أنتخة في البيت وبين حياتك في الشغل بتبقى عاملة ازاي والروتين اللي بتعيش فيه، وبتعمل Mode On لهمومك وأحزانك من تاني. طب ازاي نقدر نتعامل مع النوع ده من اكتئاب ما بعد الأجازة بحاجات بسيطة؟
- حاول تهيأ نفسك نفسيًا قبل الشغل بيوم، وتدخل في المود.
- لازم نصحح فكرة إن الأجازة يعني إننا نبعد عن الواقع، علشان طول ما الفكرة دي مسيطرة، هنحس إن مفيش أي انبساط إلا مع السفر والأجازات، وده هيخلينا ناقمين على حياتنا الروتينية بشكل عام.
- نغير مفهومنا إن السعادة بس في السفر والخروج والفسح، لأ ممكن نلاقيها في حاجات تانية زيّ علاقتنا الاجتماعية.
- لو مش متوفر أجازات طويلة بشكل مستمر، ممكن نستغل أجازات نهاية الأسبوع الصغيرة في شحن طاقتنا من تاني، وده عن طريق حاجات مختلفة بنحبها نعملها ونكسر بيها الروتين اللي بنبقى عايشين فيه الأسبوع كله.
- أول يوم ليك في الشغل بعد الأجازة حاول مايبقاش مليان حاجات كتير، رغم إن ده كتير بيكون خارج عن إيدينا.
- ملحوظة أخيرة: دايمًا بعد فترة الأجازة بتاخد قرار إنك تسيب الشغل وتقدم استقالتك، فلازم تستنى شوية لإن في الغالب القرار ده مش نابع من الشغلانة نفسها، ده بيبقى بسبب حالتك المزاجية.
فترة بنمر بيها، ممكن تبقى صغيرة ونتخلص منها مع أول إنجاز صغير في الشغل، بس لازم نفهمها ونعرف ازاي نتعامل معاها.