في ممثلين يتقال عليهم نجوم بس هما مش أبطال في أعمالهم ولا نجوم صف أول، ولكن بيمتلكوا موهبة استثنائية عالية خلتهم يبقوا نجوم في الحتة بتاعتهم، وماحدش عرف يقلدهم فيها، حتى لو كلهم نجوم كوميديا بس كل واحد بيعرف ازاي يقدمها بشكل مختلف، عارف ازاي يقدم الضحك ويرمي الإفيه غير الممثل اللي بيلعب معاه على نفس الملعب.
لو ماكانش كل واحد منهم عنده حاجة مختلفة يقدمها، ماكانش علم مع الناس وافتكرت أدواره، النجوم اللي من الفئة دي موجودين من زمان أوي من أيام الأبيض والأسود، عندك مثلًا زينات صدقي وعبد المنعم إبراهيم، وعبد المنعم مدبولي وغيرهم كتير، واللي موجودين دلوقتي أكتر وأكتر.
مش نجوم الصف الأول .. بس لازم نتكلم عنهم
إسلام إبراهيم
عنده حضور عالي وذكاء في التمثيل، وسرعة بديهية عالية في رمي الإفيه وصنع الضحك، وده لاحظناه في برنامج أقوى أم في مصر اللي قدمه، وكان متميز فيه حقيقي وبان وقتها إنه مش مجرد بيأدي الكوميديا اللي موجودة في السيناريو، لأ ده بيعرف ازاي يصنع الضحكة من الموقف نفسه بمنتهى البساطة والخفة واللي بيسموها “كوميديا الموقف” ده غير كمان موهبته الجبارة اللي قادرة على تلوين الشخصيات والتقليد وإنه يعمل أدوار ستات ببراعة زيّ النجم محمد هنيدي، وعمل أكتر من دور استثنائي منهم كان في مسلسل بـ 100 وش ومسلسل طلعت روحي.
سيد رجب
من أول لما ظهر على الشاشة والناس اعتبرته نجم مش مجرد ممثل أول مرة يطلع، لإنه فعلًا من أول مشهد ليه في فيلم حب البنات ساب علامة واتعمل من المشهد ده بعد سنين إيفيهات وكوميكس كتير، ومن بعدها وكل دور بيقدمه كإنه هو البطل، عنده ثبات وثقة في الأداء عالية، تقدر تحبه زيّ ما كان في مسلسل رمضان كريم الأب البسيط اللي مستعد يعمل أي حاجة لولاده وتقدر تكرهه زيّ دور الإرهابي في مسلسل غرابيب سود.
حنان مطاوع
من الممثلين اللي بدأوا يظهروا مؤخرًا بأدوار استثناءية شدت الناس والجمهور، ومن الناس اللي بدأ يحصلهم نضج فني بالتدريج وبدأوا يبينوا المواهب اللي عندهم شوية بشوية وكل مرة يظهر حاجة جديدة تخطفك في أدائهم، زيّ اللي حصل في مسلسل ونوس والقاهرة كابول وحلاوة الدنيا.
أحمد زاهر
قادر يتلون في الشخصيات اللي بيقدمها، موهبته بدأت تظهر للناس مؤخرًا، لما اتحطت في أدوار تبين إمكانياته للناس بشكل صح، قادر يعمل أدوار الشر بكل براعة ويخليك تكرهه زيّ مسلسل البرنس.
زينات صدقي
حبينا نختم القايمة بحد من نجوم الزمن الجميل، مشهورة بإن ليها أسلوب مميز في الأداء، بتظهر مع أي بطل أو بطلة تشيل الليلة، ليها كاركتر غريب ومميز في طريقة كلامها ومشيتها وحركاتها خلتنا لسه فاكرينها لحد دلوقتي.