مسلسل إلا أنا بيواجه هجوم من الجمهور بسبب حجاب سارة عبد الرحمن.. إيه الحكاية؟
بواسطة: ساره علي
بعد ظهور عدد من أدوار المحجبات في المسلسلات المصرية بدأ الجمهور يركز أكتر على الشكل اللي بيظهر بيه الحجاب. الجمهور شايف إن أغلب المسلسلات الحجاب بيظهر فيها بشكل مبهدل ومش بيتماشى مع شكل الحجاب حاليًا، زيّ شخصية دعاء في مسلسل سابع جار، كان حجابها مبهدل ومش مهتمة بنفسها، وأخر حاجة انتقدها المشاهد في شكل الحجاب كان مسلسل إلا أنا حكاية “تقلها دهب” اللي بتجسد فيها سارة عبد الرحمن هداية ملاك بطلة التايكوندو.
“تقلها دهب” بيعرض تلات قصص لبطلات الرياضة فريال أشرف الحاصلة على الميدالية الذهبية في رياضة الكاراتيه وسمر حمزة بطلة مصر في المصارعة وهداية ملاك الحاصلة على الميدالية البرونزية في أولمبياد طوكيو 2021 واللي جسدت دورها في المسلسل سارة عبد الرحمن.
ظهور سارة في الفرح بحجاب غير أنيق مقارنة بفرح هداية ملاك الحقيقي.
هجوم الجمهور على مسلسل إلا أنا مش علشان شكل الحجاب في حلقات المسلسل في العموم ولكن كان بسبب ظهور سارة في الفرح بحجاب من رأيهم إنه غير أنيق. وكان تساؤلهم ليه دايمًا بيطلعوا الحجاب مبهدل، مع إن المحجبات في العادي مابيكونش شكلهم كده. وإن لسه السينما والدراما بتظهر الحجاب بشكله القديم. وبدأ الناس يقارنوا صور هداية ملاك في فرحها بالصورة اللي ظهرت بيها سارة. وتعليقاتهم على السوشيال ميديا كانت “ده لو نازلة تجيب حاجة من الماركت مش هتلبس كده. أنا عمري ما شفت بنت عاملة الطرحة بالشكل ده يوم فرحها! ليه تطلعوا الحجاب بالشكل ده؟ هو في عروسة محجبة مبهدلة كده؟” وعلى الرغم من الهجوم ده بس كمان في نفس الوقت كانت في ناس ضد ده وشايفة إن الحجاب اللي ظهرت بيه شكله طبيعي وحلو عادي وشبه الحجاب الي هداية لبسته في فرحها.
ده المفروض الممثلة إلي بتمثل دور هدايه ملاك
حضرتك أنا عُمري في حياتي كلها ما شفت بنت يوم فرحها عاملة الطرحة بالشكل ده،…
Posted by مريم القاضي on Monday, January 10, 2022
