مسلسلات متحمسين نشوفها في النص التاني من رمضان

خلاص أول أسبوع من رمضان عدى، ومع خريطة المسلسلات اللي متابعينها، في مسلسلات هتخلص في نص رمضان ومسلسلات جديدة هتبدأ مكانها بمعدل 15 حلقة.

تحت الوصاية

منى زكي بتقدم فيه شخصية أم مصرية في أواخر التلاتينات بتمر بظروف صعبة بعد وفاة زوجها، وهتواجه مشاكل في إعالتهم وإنها تصرف عليهم، فتضطر تشتغل في مهنة الناس شايفين إنها حكر بس على الرجالة وهي “الصيد”، يا ترى هتعمل إيه وتواجه المجتمع ازاي؟

شكله كده هيناقش تابوهات وأزمات بتعيشها الستات كل يوم، ده غير إن أحداثه بتتصور في مدن ساحلية، زي دمياط.

المسلسل هيتعرض على (دي إم سي) وقناة دبي وحكايات.

تغيير جو

مش المرة الأولى اللي تطل فيها منة شلبي بمسلسل 15 حلقة، سبق قبل كده وكان من خلال مسلسل بطلوع الروح.

مسلسل تغيير جو بيدور حوالين شريفة، اللي هتعاني في حياتها وتواجه أكتر من أزمة، بجانب معاناتها مع والدتها من إدمان المهدئات والكحول، من الإعلان الأول للمسلسل ط، ظهرت معظم أحداثه في لبنان مع وجود أبطال لبنانيين، وبيشارك في البطولة ميرفت أمين وإياد نصار وبطل مسلسل بالطو عصام عمر في دور جديد عليه

وشكله هيقدم جرعة من النمط الهادي، وده كان واضح من التيمة اللي مفتقدينها السنة دي في المسلسلات، بعيد عن الزعيق والأكشن والتخبيط.

المسلسل هيتعرض على مجموعة قنوات (إم بي سي).

تلت التلاتة

من بطولة غادة عبد الرازق، مسلسل من نوع دراما التشويق والجريمة والغموض، أحداثه بتدور حوالين تلات بنات توأم اتولدوا في بيئات مختلفة، والجدير بالذكر إن المسلسل قبل عرضه واجه دعوى قضائية تطالب بوقف عرضه واتهامات بسرقة الأحداث الرئيسية من سيناريو اتكتب قبل كده بعنوان (لعبة التغيير)، لكن الجمهور شايف إنه مايصدرش أي حكم إلا بعد الفرجة.

المسلسل هيتعرض على قنوات النهار والنهار دراما.

جت سليمة

عودتنا دنيا سمير غانم بقالها أكتر من موسم على طابع المسلسلات الكوميدية، والسنة دي هنشوفها في مسلسل (جت سليمة) مسلسل للكبار والصغيرين، هيتعلم فيها الكبار ازاي يتعاملوا مع أولادهم، من خلال شخصية دنيا سمير غانم، اللي ظهرت خلال الإعلان بشكل مختلف، وبتشتغل محررة في دار نشر بسبب حبها القراءة، هيقع في إيديها كنز، يا ترى هتعمل فيه إيه وازاي هيغير حياتها؟

المسلسل هيتعرض على قنوات (سي بي سي).

الصندوق

من بطولة أحمد داش وهدى المفتي، وعلي قاسم، اللي هيطل علينا للمرة التانية بعد مسلسل الهرشة السابعة، وهيطل علينا أحمد داش لتاني مرة بعد جعفر العمدة، وبيركز المسلسل على الأزمات اللي بتواجه الشباب في حياتهم اليومية.

من المسلسلات المتوقع إنها تعمل ضجة وتحقق نسبة مشاهدة عالية مسلسل (تحت الوصاية) لمنى زكي، . ومسلسل (تغيير جو) لمنة شلبي.

قولوا لنا مستنيين تتفرجوا على إيه؟

آخر كلمة: ماتفوتوش قراءة: الجمهور بيسأل: فين العلاقات المشروعة في مسلسل “علاقة مشروعة”؟