رمضان السنة دي هيكون مختلف عن أي رمضان فات لأنه بسبب انتشار فيروس الكورونا والإجراءات الاحترازية ضده احتمال كبير أوي منقدرش نتجمع ولا نحس بطعم اللمة. بس من ناحية تانية روحانيات رمضان وأجواءه الاحتفالية مش هيقدر أي حد يوقفها.
وتصوير كتير من المسلسلات الرمضانية كان هيتوقف بسبب الكورونا، لكن في الأخر الأغلبية قدروا يكملوا وأضطر عدد قليل لتأجيل أعماله. سباق رمضان 2020 هيتنافس فيه أكتر من 20 مسلسل، ومن أكتر صفاته المميزة هي إن في نجوم كتيرة راجعين للشاشة بعد غياب، وده بالإضافة للشراكات الجديدة اللي بتقوي المنافسة وتزود حماسنا للموسم.
فمثلاً الزعيم عادل إمام راجعلنا بمسلسل “فلانتينو” اللي كان بيصوره السنة اللي فاتت لرمضان 2019، ولكن أتوقف لأسباب إنتاجية لفترة، وبعدها استأنفوا العمل فيه علشان يتعرضلنا السنة دي. المسلسل من تأليف أيمن بهجت قمر وإخراج رامى إمام، وبتدور أحداثه حولين رجل أعمال عنده سلسلة من المدارس وبيواجه مشاكل وأزمات بتتعرضلها السلسلة دي.
وفي أول مسلسل خيال علمي في المنطقة هيرجعلنا يوسف الشريف بعد غياب سنتين عن السباق الرمضاني. مسلسل “النهاية” بتدور أحداثه في سنة 2120 حوالين مهندس بيحاول التصدى لتأثير التكنولوجيا على العالم، ولكن كل شئ بيتغير لما بيلاقي إنسان ألي مستنسخ منه. المسلسل من تأليف عمرو سمير عاطف، وإخراج ياسر سامي.
وخالد النبوي هيجتمع بمحمود حميدة في مسلسل “لما كنا صغيرين” بعد أكتر من 20 سنة. المسلسل بتدور أحداثه في إطار تشويقي عن جريمة قتل بتقلب حياة مجموعة من الأصدقاء اللي بيشتغلوا في شركة بيملكها محمود حميدة. المسلسل من بطولة وريهام حجاج ومحمود حجازي وهاني عادل ومنة فضالي، ومن تأليف أيمن سلامة وإخراج محمد علي.
ومن الثنائيات الكوميدية، أحمد فهمى وأكرم حسنى اللي راجعين يشتغلوا سوا رمضان 2020 في مسلسل “رجالة البيت”. المسلسل بتدور أحداثه في إطار كوميدى حول رجلين اسمهم تيمون وبومبا اللي عليهم مسئوليات عائلية كبيرة، ولكن مع توالي المواقف في الحلقات بيثبتوا أنهم أبعد ما يكونوا عن تحمل المسئولية. المسلسل من تأليف أيمن وتار وإخراج أحمد الجندي.
وبالنسبة لنيلي كريم، فهي راجعة السنة دي مع آسر ياسين بعمل مختلف عن كل أعمالها الدرامية السابقة. مسلسل “ب100 وش” هو عمل لايت كوميدي بتجسد نيلى كريم فيه شخصية بتستهوى النصب وبتشتغل فيه باحتراف. المسلسل من تأليف أحمد وائل وعمرو الدالي، إخراج كاملة أبو ذكرى.
وللمرة الأولى في رمضان، نبيلة عبيد ونادية الجندي هيجتمعوا في مسلسل واحد، وده بعد ما كان النجمتين بيتنافسوا بشكل كبير في كل أعمالهم اللي فاتت. مسلسلهم “سكر زيادة” هو عمل كوميدي اجتماعي مستوحى من قصة السيتكوم الأمريكي “The Golden Girls”، وتجري أحداثه جوا فيلا بتعيش كل البطلات بعد ما بيتعرضوا للنصب وهما بيشتروها. والمسلسل هيكون فيه عدد كبير جداً من ضيوف الشرف زي أحمد السقا وبيومي فؤاد وعبد الباسط حمودة وجُمانة مراد ولقاء الخميسي، وهو من تأليف أمين جمال وإخراج وائل إحسان.
