بواسطة فرح أشرف.
مؤخرًا سمعنا إن النجم محمد رمضان -أو نامبر وان كما يطلق علي نفسه- إنه هيعمل مسلسل جديد لدراما رمضان 2021 تحت اسمم “الإمبراطور” وفيه كان هيجسد شخصية الفنان الراحل أحمد زكي، واحداث المسلسل هتدور حوالين قصة حياة واحد من أكبر رموز الشاشة المصرية.
لكن النهاردة أعلن الأسطورة علي صفحته الرسمية علي فيسبوك إنه تم تأجيل العمل على المسلسل لأجل غير مسمي حتي يتم التفاوض مع ورثة الفنان الراحل والاتفاق معهم على الطريقة اللي هيتم عرض بيها العمل.
وأعلن برضه إن دراما رمضان لسنة 2021 هتكون بنسباله مسلسل “موسى” بس لحد دلوقتي لم يتم الإعلان عن قصته من ناحية محمد رمضا أو من ناحية المنتجين.
لما أعلن محمد رمضان أول مرة عن نيته لعمل مسلسل “الإمبراطور” اثار الجدل بشكل كبير مابين مؤيدين ومعارضين، وكتير من المجموعة الأخيرة زعموا إن محدش يقدر يقوم بدور في حجم الفنان أحمد زكي لإن إمبراطور الشاشة الراحل في مستوى تاني فنيًا.
الممثل القدير أحمد زكي كان ثروة فنية كبيرة ذات قيمة وقامة، وحياته كانت مليانة بالإنجازات والأعمال الفنية المختلفة وعلاوة على ده هو قدر يقوم بأدوار كتير بتمثل كل أطياف المجتمع المصري سواء غني أو فقير أو شريف أو فاسد أو واعظ أو حاكم أو رئيس أو طبال أو مصور أو حتى ملاكم .
وقع اختيار محمد رمضان علي هذه الشخصية لحبه الشديد وتقديره للفنان ولإنه ببساطة مثله الأعلي حسب ما قال قبل كده في كذا مقابلة تلفزيونية له.
محدش عارف لسه الورثة قرارهم ممكن يكون إيه بس اللي عارفينه أكيد إن عمل زيّ ده هيكون حاجة مشوقة إن نتابعها خصوصا لعشاق احمد زكي.
آخر كلمة: اتفقنا أو اختلفنا على محمد رمضان منقدرش نختلف إنه فنان موهوب وشخص ناجح.
