معظمنا عارف الفنان أحمد أمين من فيديوهاته القصيرة اللي كان بينشرها على الإنترنت باسم “30 ثانية”، وبرنامج “البلاتوه” اللي كان بيتعرض على قناة النهار، ومعظمنا برضه عارفين محتواه الكوميدي والساخر اللي كان بيقدمه، وهو ده اللي خلانا نحبه من بداية ظهوره، خفة دمه اللي عمرها ما كانت بايخة، واللي على طول بيتكلم في مواضيع بتهمنا كلنا ومواقف بتحصل فعلًا كل يوم في حياتنا ولكنه بيوصلها بطريقة مضحكة.
أحمد أمين اتولد في 11 يوليو سنة 1980، وهو ممثل، ومؤلف، ومقدم برامج، وكوميديان، واتخرج من كلية الفنون الجميلة، واشتغل في الإخراج والرسوم المتحركة زيّ “القبطان عزوز”، وشارك في مسلسل “الوصية” اللي قدر فيه يلفت نظر الجمهور علشان خفة دمه، ولما اترشح لدور رفعت إسماعيل في مسلسل “ما وراء الطبيعة” الناس استغربت، لإن المسلسل متصنف رعب وتشويق، وبالصدفة أحمد أمين كان بيحب الراحل أحمد خالد توفيق، وكان بيشتغل معاه في فترة من حياته في نفس المجلة، وكمان كان بيحب شخصية الدكتور رفعت إسماعيل بالذات.
وفعلًا الجمهور اتفاجأ بأداء أحمد في المسلسل لإن شخصيته كانت حاجة مختلفة تمامًا عن اللي إحنا متعودين عليها، لكنه عمل الدور كويس أوي، وقدر يوّصل الشخصية ببراعة، ودوره ماكنش خالي من السخرية والكوميديا السودا، وخلانا نضحك برضه في وسط الرعب والإثارة اللي كانت في المسلسل، وقدر يثبت إمكانياته في التمثيل في أول عمل درامي ليه.