بظهور مميز في مسلسل الاختيار 2، خلى الناس كلها تتكلم عن نضجه الفني وعن كمان أدواره اللي ماتتنسيش، ماجد الكدواني بينضم لضيوف مسلسل الاختيار 2، والناس بتتخيل مشاهده مع الأبطال، لكن من أفلام قديمة ليهم بإفيهات علقت في دماغنا وشبه بقت جزء من يومنا وكلامنا، وكمان الناس افتكرت ماجد الكدواني عمل دور الظابط كام مرة، وكلهم كانوا مختلفين عن بعض، بين الكوميدي والتراجيدي، قدر ماجد الكدواني يسيب بصمة في كل دول، لكن إزاي بيسيب بصمة جديدة بدوره في الاختيار 2؟
في البداية، وقبل حتى ما تيجي مشاهد بتجمعه مع كريم عبدالعزيز وأحمد مكي، الناس على السوشيال ميديا افتكروا إفيهات لماجد الكدواني معاهم في أفلام تانية بنحبها، وعملوا ميمز ماتتفوتش.
أما الأدوار اللي فاتت لماجد الكدواني كظابط، كل دور فيهم له طابع مختلف، مستحيل تحس إن في شخصية منهم شبه التانية، تعالوا نفتكر شوية منهم.
سراج بيه
من فيلم لا تراجع ولا استسلام، واسم الشهرة “سراج مهمة” طبعًا، بدور ظابط سري بطريقة كوميدية، للقبض على تاجر مخدرات كبير، باستخدام شبيه لمساعد تاجر المخدرات، وده كان يمكن أكتر دور مميز لظابط في مهمة سرية خلانا كلنا نضحك من قلبنا.
الظابط عصام
في فيلم 678، بشخصية مختلفة تمامًا عن ماجد الكدواني اللي اتعودنا إنه يضحكنا، لكن في فيلم عن قضية مهمة زيّ التحرش، قام بدور الظابط، اللي كانت مهمته التحقيق في البلاغات اللي بتتقدم عن إصابة الرجالة في الأتوبيسات بطعنات.
عسكري الترحيلات
في فيلم ساعة ونص، اللي بيمثل قصة مأساوية لحادث قطار، لكن قدم فيه ماجد الكدواني دور رغم إن مساحته مش كبيرة، لكنه أثر في الناس بشكل كبير، ولحد دلوقتي بنشوف عليه ميمز.
عسكري متولي
عسكري الأمن المركزي في فيلم عسكر في المعسكر، اللي على نياته ومطلوب منه ياخد بالتار من صاحبه وزميله ودفعته، وبنشوف طول الفيلم شخصية مميزة قدر يقوم بيها بطريقة لذيذة وعلقت في ذاكرتنا لحد النهارده.