فرجتنا على مسلسل (جت سليمة) رجعتنا لأجواء فوازير رمضان زمان، من تتر المسلسل وأنت بتشوف شخصيات مختلفة بتقدمها دنيا سمير غانم، واستعراضات في الحلقات لفتت الانتباه، ومع قوة في الحضور وتقليد للشخصيات وسرعة بديهة دايمًا حاضرة، ومع الأزياء المختلفة اللي بتزغلل العين، سألنا ليه مابقاش في فوازير زي زمان زيّ نيللي وشيريهان نستغل فيها موهبة دنيا سمير غانم؟
الفوازير كانت جزء أساسي مرتبط برمضان كل سنة أيام زمان، زيها زي المسحراتي والسوبيا والتمر هندي، الناس كانت بتسنتى تشوف فزورة اليوم، وكانت العائلة بتقعد مع بعض علشان تحلها في ورقة كشكول وتفضل تسجل الحلول كلها يوم بيومه لآخر رمضان.
نيللي كانت ملكة الفوازير، فضلت متربعة على العرش لأكتر من 13 سنة، قدمت فيها (صورة في فزورة) و(عروستي) واللي كانت مليانة بأشعار صلاح جاهين، و(الخاطبة) اللي كانت فكرتها إن المشاهد يخمن مهنة التلاتين عريس على مدار الشهر، وطبعًا مانقدرش ننسى فوازير (أم العريف).
وبعدها، ظهرت شيريهان وأمتعتنا بمسلسلات (ألف ليلة وليلة) و(فوازير حول العالم) وغيرها وغيرها، وبعد الأيقونتين نيللي وشيريهان كان في محاولات من نجوم كتير على مدار أكتر من 10 سنين، ولكن ماكانتش في نفس المستوى لحد لما اتقدمت آخر التجارب سنة 2007، من وقتها مافيش أي محاولات تانية للفوازير.
ممكن يكون علشان بتتطلب معايير غير المعايير اللي متعودين عليها في الدراما، أو يمكن بعد نجاح نيللي وشيريهان الصناع نفسهم خايفين يدخلوا في مخاطرة، أو يمكن علشان لسه مالقوش المجموعة اللي تقدر تشيل عمل زي الفوازير، لإن الموضوع مش مقتصر بس على بطل، في مصممين استعراضات وفي شعراء هينافسوا صلاح جاهين، بس يمكن لو حاولنا واختارنا الناس الصح ودورنا كويس وعملناه بشكل يناسب السوشيال ميديا، هيلاقي قبول بشكل مايهدمش ذكرياتنا مع فوازير زمان.. وبالمناسبة ترشيحنا لدنيا سمير غانم ماجاش من فراغ، نيللي قالت في تصريح لها قبل كده إن دنيا هي أجدر واحدة تقدم الفوازير.