واحنا في نص رمضان، بدأت الشخصيات كل مسلسل تظهر وتبان أكتر وأكتر، وتبان دوافعها ونوايها وتبان على حقيقتها، وشخصية مهرة في ضرب نار اللي بتعملها ياسمين عبد العزيز زعلت الجمهور منها، ونقدر نقول ظهرت وبانت للجمهور بعد حبس جابر الكوماندا (أحمد العوضي) واعتبروها باعته وناكرة للجميل.
رغم إنه اتحبس ظلم بعد ما اتورط في قضية مخدرات، مهرة قررت تخلعه بعد أيام قليلة من دخوله السجن، ومش بس كده، هي اتخطت حزنها على جوزها في ثواني اللي كانت بتقول فيه شعر وإنها عمرها ما حبت ولا هتحب بعده ولا قبله، وقررت تتجوز من زيدان (ماجد المصري) رجل الأعمال اللي رفضته تلات مرات بحجة إن الفلوس مش مهمة عندها وإن الألوان والعيشة الأبهة مابتغويهاش، بس عادي جدًا بقت تغويها وبقت طايرة وفرحانة بها.
ومش بس كده، دي قررت تختمها بإنها تكتب ابنها اللي خلفته من جابر على اسم زيدان علشان حياته تبقى أحسن ومايبقاش أبوه رد سجون، بس سمته حسن زي ما كانت متفقة مع جابر.. أصيلة والله يا مهرة.
تفتكروا بعد كل اللي عملته مهرة ده احنا ظالمينها وجايين عليها؟ ولا الدنيا لطشت فيها وضعفت؟ المهم إن جابر الكوماندا خلاص هيطلع من السجن علشان يحاسب الكل وهنشوف انتقامه هيبقى عامل ازاي، ونتمنى الأستاذة مهرة تحاول تحسن موقفها مع جمهورها في الحلقات اللي جاية.