شلل مروري مستمر من الصبح على الطريق الدائري من ناحية اللي جاي من الوراق في اتجاه ميدان الرماية، بسبب حريق مصنع في فيصل اتسبب في تعطيل حركة السير على الدائري في فيصل، فلو انت متعود تتحرك في الطريق ده، خلي بالك وامشي من طريق تاني، بس إيه حكاية الحريق اللي مستمر وبيتجدد اندلاع النار فيه بقاله 40 ساعة؟
حريق في مصنع ومخزن للأحذية في نزلة فيصل من على الطريق الدائري في منطقة سكنية، والمصادر الأمنية بتقول إن التدخل للإطفاء صعب لوجود احتمالية لإنهيار البرج اللي فيه الحريق في أي لحظة، لإن النار أكلت الخرسانة، وده مصعب مهمة الحماية المدنية في السيطرة على الحريق، وتم المناقشة مع متخصصين وانتهى الأمر بإن الحماية المدنية ماينفعش تستخدم مواد معينة في الإطفاء، وإنه يستنوا انخفاض درجة الحرارة في الحادث وهدوء الأوضاع.
الوضع أصعب لإن المخزن والمصنع في برج سكني بيضم 108 شقة سكنية، والمخزن في البدروم وده اللي اندلعت فيه الحريق، ورجحت المعاينة إن الحريق نتيجة ماس كهربائي، ووجود مواد سريعة الاشتعال هو اللي تسبب في تفاقم الأزمة بالشكل ده، الحماية المدنية لحد اللحظة دي مستمرة في وضع خطط للسيطرة على الحريق بأقل خسائر ممكنة، وبنتمنى الأمر ينتهي من غير خسائر بشرية ومن غير ما البرج لا قدر الله ينهار.