مين مابيحبش إسكندرية؟ بيسافرلها الناس طول السنة في الصيف والشتا من كل المحافظات ومن كل البلاد كمان، فهي بلد إسكندر الأكبر وحضارات كتير، وجوها لا يعلى عليه، وبحرها مايتوصفش، وغنى لها ناس كتير زيّ فيروز، وعلي الحجار، وأحمد منيب، ومحمد منير، والشيخ إمام، ومحمد الحلو، وبمناسبة إن موقع تريب أدفيزور “tripadvisor” اختار مدينة الإسكندرية كأحد أفضل الوجهات السياحية الرائجة على مستوى العالم لسنة 2021، وبما إننا في الشتا، وكلنا عارفين إنها بتبقى مثالية أكتر دلوقتي، رغم إننا بنكون بردانين جدًا ولكننا بنتحمل البرد بطريقة ما، فتعالوا نشوف ليه بتبقى أحلى في الشتا.
الآيس كريم
الآيس كريم كتير مايقدروش ياكلوه في جو الشتا البرد، ولكن هناك بيجيلك قدرة إنك تستحمل الآيس كريم وبناكله وبنحس بمتعة وانتعاش.
الزحمة
إسكندرية في الصيف بتكون زحمة جدًا علشان كله بيروحها من كل حتة، ولكن في الشتا بتكون هادية ومفيش دوشة ولا زحمة.
البرد
برد إسكندرية من الأجواء اللي نقدر نستحملها ونستمتع بيها، فالبرد مش بيخش في عضمك زيّ معظم أجواء البرد اللي عيشناها، والبرد بنحسه بيكون فريش كده.
المطرة
المطرة من أجمل الحاجات والتجارب اللي بنعيشها على كوكب الأرض، وفي إسكندرية المطرة تقريبًا شغالة على طول، فبتخلي في إحساس عام في الجو بيدي طمأنينة وسكون.
الشوارع
بعد المطرة بقى، الشوارع هناك بتكون خالية من الرطوبة، وبتكون نقية، ومش بتتغرق، وبتستمتع بإنك تتمشى على الكورنيش.
الأكل
في الشتا بنلجأ للأكل علشان نتدفى علشان مفيش أحسن من الوسيلة دي نتدفى بيها، وإسكندرية معروفة بمطاعمها اللي بتقدم مختلف الأصناف بأحلى جودة.
الفُسح
معالم سياحية كتيرة في إسكندرية نقدر نزورها ونتفسح فيها ونستمتع بوقتنا، زيّ قلعة قايتباي ومكتبة الإسكندرية.
القهاوي
القهاوي اللي على البحر اللي البرد بيكون قاتلنا فيها ولكن بنطلب حاجات سخنة نشربها تدفينا زيّ السحلب وحمص الشام والشاي، ونستمتع بأجواء ومنظر البحر.