بعد ما شوفنا ليلة الدموع في السعودية وكان بيحيها كوكبة من النجوم المعروفين بتقطيع الشرايين، الكويت حبت تعيّش الجمهور ليلة تانية من جلد الذات وتقطيع الشرايين في حفلة تحت عنوان “ليلة النكد”في قاعة البركة بفندق كراون بلازا واللي هتتعمل يوم 20 يونيو اللي جاي، وبرغم الجدل اللي طلع بسبب أسعار التذاكر الخيالية إلا أن الناس اللي بتحب النكد تحمست لليلة.
وقال منظم الحفل أحمد الخالدي، أنه هيخوض تجربة موسيقية مختلفة من خلال النجوم اللي هيحيوا الحفلة وهما رامي جمال وحمادة هلال وأحمد بتشان ومسلم وأحمد فريد علشان يبقوا خماسي قاتل.
وفي الحقيقة الاختيار الخاص بالنجوم كان في محله، نبدأ مثلًا بالفنان حمادة هلال عندوا كتالوج لكل مناسبة وفي الدموع ماكانش بيتوصى خصوصًا في القديم تقدر تسمع له “دايمًا دموع دموع” ودي بيهديها لكل واحد مجروح ولا أغنية، “كل ما أفكر فيك كل ما أحن إليك كل ما ببكى عليك، قلبي يقولي انساه ملناش مكان جواه” ولا أغنية ساعات اللي بتديلك قاموس في الوجع ومين في الدنيا مش مجروح كده كده” ساعااااات الجرح بيريح ساعات الدمع بيهدي .. وليه على إيه هنتألم ماهو كله بيمشي ويعدي”
والمطرب أحمد بشتان من الأفضل أنه يبدأ بأغنية “خلصت خلاص” من مسلسل الأسطورة اللي كانت بداية انطلاقه في الحزن وتختم بأغنيته الجديدة “بعد فراقك” أما بالنسبة لمسلم فكفاية بس يغني أغنية “واتنسيت” وأحمد فريد يقفلها بـ”لو جاي في رجوع إنساني”، أما عن رامي جمال مزعلنا وجوده في القائمة علشان كان مرتبط بمعانا بالضحك والفرفشة فإيه اللي هيوديه هناك بس؟
آخر كلمة: ماتفوتوش قراءة: المسرح المستقل.. كيفية مناقشة قضايا عميقة بأدوات بسيطة