في لفتة مميزة من مكتب إكسبو دبي، أعلنوا إن المعرض هيسمح بالدخول المجاني والغير محدود لكل العاملات والمساعدين وربات البيوت، وكل اللي عليهم بس إنهم يقدموا نسخة من أوراق إقامتهم مع أوراق الشغل عند مكتب التذاكر اللي بيسمح بالدخول.
غير فئات المساعدين وربات البيوت، في فئات تانية مسموح لها بالدخول المجاني زيّ الشباب من فئات (6-17سنة) وكبار السن فوق الـ60 سنة والطلبة وأصحاب الهمم وذوي الاحتياجات الخاصة.
خطوة إيجابية ولفتة تستحق التقدير من كل القائمين على الحدث ده، وفرصة مميزة لكل المساعدين إنهم يشوفوا حدث ضخم زيّ ده، كل العالم كان مستنيه وحديث كل الصحف والإعلام من أول يوم الافتتاح وهيفضل لحد أخر يوم له، هيعيشوا من خلاله رحلة سفر لكل دول العالم من خلال مكان واحد.
وفي جانب إيجابي تاني للموضوع، وده طبعًا من وجهة نظر الأمهات والعائلات، اللي متعودين يجيبوا معاهم أطفالهم، خصوصًا إن المسئولين عن كل التنظيمات بيعملوا باقات عائلية بعروض مميزة منها خصومات على الأكل والشرب، ده غير إن الباقة العائلية اللي بتتضمن تذكرتين صالحين للدخول لمدة 6 شهور كاملة، ده غير تذكرة المربية اللي بقت مجانية، مع سماحية لالتقاط الصور الفوتوغرافية، ده غير الحجوزات اللي تقدر تعملها من خلال طوابير ذكية من غير ماتحتاج تقف في طوابير في الأيام اللي بيبقى فيها زحمة، كل دي مميزات بيعملها إكسبو علشان يجذب فئات وعدد أكبر للزيارة والمشاركة في الحدث.