للكريسماس: 5 وصفات مختلفة لعمل الديك الرومي
في موسم الأعياد والاحتفال بالسنة الجديدة، من أشهر الأطباق الرئيسية اللي بيكون ملك السفرة من سنين لحد دلوقتي هو الديك الرومي، وكل مرة الناس تتفنن بوصفات علشان يغيروا من طريقة طبخه علشان يعجب كل اللي هياكل منه، وعلشان خلاص احنا في موسم الأعياد والاحتفالات، ده وقت التدوير على وصفات مختلفة بنكهات مميزة للديك الرومي.
مشوي بالزبدة والأعشاب
المقادير:
ديك رومي كامل مغسول كويس من الداخل والخارج
3 رؤوس ثوم متقطعة نصين بالعرض
3 شرائح ليمون
6 أعواد زعتر طازة
6 أعواد روزماري طازة
نص كوب زيت زيتون
1/8 كيلو زبدة
معلقة صغيرة زعتر طازة مفروم
4 معالق صغيرة ثوم مفروم
ملح وفلفل أسود
الطريقة:
هنسخن الفرن على درجة حرارة 220 درجة مئوية، ونحط الزبدة والزعتر المفروم والثوم المفروم والملح والفلفل الأسود، نقلب كويس لحد ما المكونات تختلط، هنحط نص كمية الزبدة في التلاجة لحد ما نحتاجها، ونغلف صينية فرن بالفويل، بعدين نوزع عليها أربع أنصاف من رؤوس الثوم وأربع أغصان من الزعتر وأربع أغصان من الروزماري وشريحة ليمون ونص كمية زيت الزيتون، بعد كده هنتبل الديك الرومي بالملح والفلفل من الداخل والخارج، وبعدها نحشي الديك بباقي رؤوس الثوم وأغصان الزعتر والروز ماري وشرائح الليمون.
بعدين ندوّب الزبدة بالأعشاب، وندهن بها جلد الديك وتحت الجلد، ونحط الديك الرومي في الصينية، ونخلي الصدر لتحت، ونوزع باقي الزيت فوق الديك الرومي، ونحط الصينية في الفرن لمدة 30 – 45 دقيقة، بعدها نقلب الديك الرومي على الناحية التانية، وندهنه بنص كمية الزبدة اللي شيلناها في التلاجة، وبالسوائل الموجودة في الصينية.
هنحط الديك الرومي في الفرن على درجة حرارة 165 درجة مئوية لمدة ساعة، وندهن الديك مرة تانية بباقي الزبدة المحفوظة في التلاجة، وندخله في الفرن تاني لمدة 30 دقيقة، لحد ما يبقى لونه دهبي، هنطفي الفرن بعدها، ونغطي الديك بالفويل لمدة 20 دقيقة، بعد كده نقطعه.
ديك رومي محشي بالأرز
المقادير:
ديك رومي كامل
2 كوب من الملح الخشن
نص كوب من الزبدة
2 معلقة صغيرة من البابريكا
معلقة كبيرة من الأوريجانو
نص كوب من عصير الليمون
معلقة كبيرة من بشر الليمون
5 فصوص ثوم مفروم
2 حبة من القرنفل
عود من القرفة
ورق لورا
4 حبات من الجزر المقطع
5 حبات من البصل المقطع
مقادير الحشو:
6 كوب من الأرز المصري
كيلو من كبد الفراخ
معلقة صغيرة من الملح
نص معلقة صغيرة من الكزبرة
معلقة صغيرة من الكركم
معلقة صغيرة من الأوريجانو
عود من القرفة
ليمون مجفف
2 من ورق اللورا
كوب من البقدونس المفروم
ربع كوب من زيت الذرة
ربع كوب من زيت الزيتون
2 حبة من البصل المفروم
2 ثمرة من الفلفل الأخضر المفروم
6 فصوص ثوم مفروم
ثمرة من الفلفل الأصفر
ثمرة من الفلفل الأحمر
فستق حلبي محمص
لوز محمص
صنوبر محمص
الطريقة:
نغسل الديك الرومي كويس وبعدها يتنقع في المياه والملح لمدة لا تقل عن ساعتين، ونبدأ في تحضير الحشوة ونحط وعاء على النار فيه زيت زيتون وزيت ذرة وملعقة صغيرة من السمنة، ونحط البصل المفروم ونقلب مع إضافة الثوم المفروم، ونضيف الكبدة مع التقليب لحد ما يتغير لونها، وبعدها نضيف الفلفل الأخضر والفلفل الألوان والبقدونس المفروم، ونقلب المكونات مع بعض، ونزود عود القرفة وورق اللورا، والملح والأوريجانو والليمون المجفف، بعدها نحط 3 كوبايات مياه ساخنة نسيبهم على النار لمدة 5 دقائق لحد ما يبقى نص سوا، ونضيف المكسرات، بعدها نخلط عصير الليمون مع الثوم المفروم، ونص كوب من الزبدة والبابريكا ونقلب المكونات كويس.
هنصفي الديك الرومي من المياه وننشفه كويس وندهنه بالخليط اللي عملناه، ونحشي الديك الرومي بالحشوة اللي حضرناها، من الداخل وتحت الجلد، واللي يتبقى من الحشو نحطه على النار لحد ما يستوي، ونحضر صينية مدهونة بالزبدة نحط فيها الجزر المتقطع والبصل، وبقية البقدونس والثوم المفروم وعود من القرفة والقرنفل، ونحط عليها الديك الرومي ونغطيه بالورق الألمونيوم، وندخل الصينية الفرن على درجة حرارة 180 لمدة 3 ساعات، بعدها نشيل الورق الألومنيوم ونرجع الصينية للفرن مرة تانية لحد ما يستوي ويحمر لونه، بعدها نحط بقية الحشوة في طبق كبير للتقديم، يتحط فوقه الديك الرومي والخضار الموجود معاه.
ديك رومي بالبرتقال
المقادير:
ديك رومي كامل
2 كوب من المياه
3 معالق كبيرة روزماري طازة ومفروم
3 معالق كبيرة بشر برتقال
ملح وفلفل أسود
مقادير الصوص:
نص كوب عصير برتقال
3 معالق كبيرة مربى برتقال
معلقة كبيرة خل
معلقة كبيرة زبدة
معلقة صغيرة روزماري طازة مفروم
ربع معلقة صغيرة فلفل أسود مطحون
الطريقة:
نحط الروزماري وبشر البرتقال والملح والفلفل الأسود في وعاء، ونقلب كويس، ونتبل الرومي بالخلطة دي من الداخل والخارج وبين الجلد واللحم، بعدها نحطه في التلاجة طول الليل، والصبح نخرجه ونسيبه في درجة حرارة الغرفة لمدة ساعة، ونحط عصير البرتقال والمربى والروزماري والخل والزبدة والفلفل الأسود على نار متوسطة، ونسيبهم لحد الغليان، بعدها نوطي النار ونسيبه يغلي لمدة خمس دقائق، لحد ما يتقل، ونسخن الفرن على درجة حرارة 220 درجة مئوية.
نحط الرومي في صينية فرن متغطية بورق فويل، ونحط الصينية في الفرن لمدة 30 دقيقة، ونوطي الفرن على درجة حرارة 180 درجة مئوية، ونضيف مياه للصينية من غير ملامسة الرومي من فوق، ونسيبه في الفرن لمدة 60 دقيقة، وندهنه بنص كمية صوص البرتقال، بعدها ندخله في الفرن لمدة 30 دقيقة، ونغطيه بورق الفويل، ونسيبه في الفرن لمدة 30 دقيقة.
شرائح بيكاتا الديك الرومي مع الخضار السوتيه
المقادير:
نص كيلو من شرائح الديك الرومي، وتكون متقطعة على شكل فيليه من غير عظام أو جلد
٢ معلقة كبيرة من زيت الزيتون
٢ معلقة كبيرة من الزبدة
٢ كوب من مرقة الدجاج
كوب ونصف من الدقيق الأبيض
ربع كوب من الحليب
ملح وفلفل أسود على حسب الرغبة
٢ معلقة كبيرة من عصير الليمون، حوالي ليمونة كبيرة
خضار سوتيه طازة: شرائح الجزر، والكوسة، والفاصولياء الخضراء، وشرائح الفلفل الأحمر
بقدونس مفروم للتزيين
الطريقة:
في الأول ندق شرائح الديك الرومي على لوح تقطيع اللحوم، ونجيب صينية ونحط فيها الشرائح، ونتبلها بالملح والفلفل، ونغمسها في الحليب، بعد كده نرش شرائح الديك بالدقيق، ونتخلص بعدها من الدقيق الزايد، هنسخن زيت الزيتون في طاسة على نار متوسطة ونحمر شرائح الديك في زيت الزيتون لحد ما لونها يبقى دهبي من الناحيتين، ونرفعها من على النار.
بعد كده هنضيف لزيت الزيتون المتبقي من التحمير زبدة وعصير الليمون ومرقة الفراخ ومعلقتين كبار من الدقيق، ونقلبهم على النار لحد ما يكون صوص خفيف على شكل صلصة بيضاء، ونسيب الخليط على النار لحد ما يغلي، بعدين نحط شرائح الديك الرومي على الخليط ونوطي درجة الحرارة لحد ما الشرائح تستوي، ونحط الشرائح في طبق التقديم، وفوقها الصلصة المتبقية (صلصة الزبدة والليمون) ونزينها بالبقدونس المفروم، ونضيف شرائح الخضار السوتيه الملونة.
صدور الديك الرومي بالمشروم
المقادير:
2 صدر ديك رومي
3 فصوص ثوم مفروم
2 معلقة كبيرة زيت زيتون
10 حبات طماطم شيري
100 جرام مشروم
نص معلقة صغيرة زعتر
ملح وفلفل أسود و توابل حسب الرغبة.
الطريقة:
نقطع صدور الديك الرومي شرائح ونتبلها بالتوابل والزعتر والملح والفلفل الأسود، ونقطع الطماطم أنصاص، ونقطع المشروم لشرائح، ونحط الزيت في طاسة على نار هادية وبعدين نضيفله الثوم ونشوحه، ونضيف عليه شرائح الديك والطماطم والمشروم المتقطع، ونسيبهم على نار هادية لحد ما يستوي.
الديك الرومي من الوصفات اللي بتحتوي العيلة وبتلم وتجمع الناس حواليها، زيها زي المحشي والمكرونة بالبشاميل، واخد هيبة على السفرة، وله وضعه وممكن يعلي على أي أكلة جنبه، والناس بتشتاق له لإنه مربوطة بالمناسبات والأوقات الحلوة والاحتفالات.. فلو اتعملت في العيد بيبقى العيد عيدين.