في الشتاء -ولسبب غير معلوم- بنحب نغيّر من ستايل شعرنا ونعمل قصة تليق بالشتاء، من ناحية تدفينا ومن ناحية تانية تبقى ماشية مع لبس الشتاء اللي غالبًا بنكون غرقانين جواه ومش باينين، فنكمل الطقم بقى بقُصة مدارية نص وشنا، علشان مود الشتاء كمان بيميل للحاجة للانعزال والاختفاء، فبنحب نستخبى جوا سويت شيرت كبير وواسع ونحس إننا مختفيين.
قُصة
عارفين اللي كل ما نعملها نندم تاني يوم دي؟ هي دي. القُصة اللي مافيش بنت تقريبًا ماجربتهاش، ومافيش بنت برضه مش بتحن لستايل شعرها بالقُصة، القُصة تعتبر بشكل ما بطلة ستايلات الشعر في الشتاء وتحس إنها بتبقى لايقة على الشتاء أكتر، لإن في الصيف ماحدش طايق نفسه علشان يطيق قُصة واكلة نص وشه.
القصة لها مميزات كتير وبتدوّر الوش زي ما أمهاتنا بيقولوا، وبتدي إحساس بصغر السن والحيوية، وكمان بتحسسك بطول شعرك لإن بيبقى في فرق بينها وبين باقي الشعر.
التوكة الفرو
طالعة بدور مهم بقالها كذا سنة، وطبعًا توكة فرو يبقى لازمها إيه؟ قطتين طبعًا.
مهما نكبر القطتين جزء لا يتجزأ من حياتنا، وأول ما نعملهم نفتكر طفولتنا ونحس إننا صغرنا، وننسى هم الكبار اللي احنا فيه دلوقتي.
كمان التوكة الفرو دي ينفع يتعمل معاها ستايلات شعر مختلفة، زي إننا نسيب شعرنا ونحطها، أو نلمه على ورا، أو لو أصلًا عملنا القُصة زي أول ستايل، التوكة دي طبعًا نلبسها في البيت لحد ما الناس تتعود على شكلها ونلبسها برا بمنتهى الثقة.
كاريه
الراعي الرسمي للشتاء، إننا نقص شعرنا خالص والغالب في القص بيكون الكاريه، علشان شعرنا يبقى مدفي وشنا كده، والجميل إن الشعر القصير أو القصة الكاريه بتليق على كل أنواع الشعر، مفرود أو كيرلي أو ويفي، القصة دي بتخلّي الشعر يبان أتقل وبتكون لايقة على الوش، أيًا كان بتدي شكل جميل.
ومن مميزاتها كمان إن موضتها مش بتبطل، مش زي قصات كتير بتطلع موضة وتختفي أو تبقى خلاص راحت عليها، فنقدر كل شتا نعمله كاريه عادي بقلب جامد.
الضفاير
دي مكملة معانا صيف شتاء، في الصيف بنحبها وبتلم الشعر علشان مانحسش بالحر، وفي الشتاء بنحبها برضه بس علشان لو مكسلين نعمل ستايل للشعر بتبقى هي الاختيار الأمثل والأسهل، هتلم الشعر وممكن نحط فيها توكة، وممكن نعملها بأكتر من طريقة سواء ضفيرة واحدة أو ضفاير كتير بتتلم في الآخر في ضفيرة أو اتنين.
الضفاير دلوقتي مش مقتصرة على البنات الصغيرة زي زمان، ومش هنسمع حد بيقول لنا جملة سخيفة زي “إيه ده رايحة المدرسة ولا إيه” علشان خلاص التسريحة دي بنات كتير بتعتمد عليها سواء في الصيف أو الشتاء.
الآيس كاب
في الأيام اللي بنكسل فيها نعمل شعرنا وبيبقى شعرنا متأثر بالبرد وبيعاندنا، بيبقى حل أمثل في الحالات اللي زي دي هو الآيس كاب، بيدفي وفي نفس الوقت ينقذ شكلنا في الحالات الحرجة دي، وممكن نستبدله بالكاب العادي كمان، أي حاجة على الشعر بتدي شكل حلو ودفا كمان.
الآيس كاب دلوقتي موضة وبأشكال وألوان كتير، والكاب كمان ممكن تطبع عليهم أي حاجة بتحبها، شخصيات مسلسل أو فيلم بتحبه أو لوجو لأي حاجة بتعبر عنك، ساعتها مش هيبقى مجرد حل للدفا، هيبقى قطعة أساسية في ستايلك وبتحسسك إن لبسك بيعبر عنك.