زي ما عملنا في أول أسبوع في رمضان قايمة كده بمسلسلات وأحداثها والحاجات اللي عجبتنا فيهم، وقولنا رأينا في حلقات الأسبوع الأول من رمضان، وكانت البدايات حلوة ومشرقة، لكن شكلها كده دي كانت حلاوة البدايات بس.. مسلسلات كتير طلعت عكس توقعاتنا، سواء توقعنا إنها تبقى حلوة وخذلتنا، أو مسلسلات ماكناش نتوقع إنها تكسر الدنيا كده وتقدم حاجة حلوة، تعالوا نشوف كده.
فين “المشوار”؟
هل الكنز في الرحلة بس؟ يعني بنشوف مشوار كده بس ومش فاهمين مين بيعمل فيه إيه، المهم إنه مشوار؟ فين القصة؟ طب المشوار ده لإيه؟
في البداية الناس تحمست للمسلسل ولإخراجه وتصويره ولأداء محمد رمضان ودينا الشربيني وإنهم بيقدموا تمثيل بشكل كويس، لكن مع مرور الحلقات، وكان نفسنا نقول كمان مرور الأحداث، لكن للأسف مافيش أحداث.
كل البنات بتحبك
المسلسل بدأ حلو وأحداث وقصة وكاريزما مزدوجة كمان، لكن الحقيقة لما لقينا حاجة كليشيه بتتعمل من قديم الأزل في المسلسلات والأفلام الأبيض وأسود، حماسنا قل من مسلسل “راجعين يا هوى”. بشكل ما خالد النبوي بقى فجأة كل البنات بتحبه، الإكس والدكتورة النفسية وحتى مرات أخوه اللي تعتبر عدوته، وهو ماشي يوزع mixed signals على كل ستات المسلسل. يمكن دي تكون حاجة هنفهم المغزى منها بعدين وليها حكمة؟ بنتمنى ده، علشان الحتة الكليشيه دي غيرت توقعنا عن المسلسل.
“مين قال” احنا معاكم في اللي تقولوه
المسلسل يمكن ماخدش حقه والناس ماكانتش بتتكلم عنه في البداية، وماكانش بالمفهوم المعروف له بطل واحد نجم شباك شايل المسلسل، وبالمقاييس والمعاير ماكناش سامعين عنه، لكن بالقضايا اللي ناقشها والقصة والإخراج، قدر يثبت نفسه في السباق الرمضاني. شوفنا المسلسل بيناقش مشاكل بيواجهها الجيل الجديد، خصوصًا مع الأهالي، ومع بعض في المدرسة، من تنمر لمقاييس ومعايير لو أنت مش ضمنها، تبقى مش مننا، حاجات كتير أثرت في الناس بشكل حقيقي. وفي 15 حلقة بس، من غير مط وتطويل.
جزيرة غمام
بنفس الطريقة، المسلسل ماخدش حقه في الدعاية من الأول، لكن الممثلين فيه كلهم في أحسن حالاتهم، حتى اللي خرجوا من جلدهم زي أحمد أمين، وكمان الناس كلها متفاجئة بالأداء اللي بتقدمه مي عز الدين واعتبروه رجوع قوي ليها، ده غير طارق لطفي اللي بيقدم دور شر مختلف ومميز عن كل أدواره.
دنيا تانية
الحقيقة متعودين من نجمة كبيرة زي ليلى علوي على مسلسلات بتناقش مواضيع مختلفة، لكن السنة دي تقريبًا المسلسل ماكانش بأحسن حالة، وبدأ بمشاكل مع الرقابة من الحلقة الأولى لما اتعرضت بنسختها اللي اترفضت من المصنفات الفنية وتم تعديلها، لكن اللي اتعرضت كانت الحلقة بدون التعديلات. ده غير القصة والأحداث اللي مانجحوش في شد المشاهدين لحد نص رمضان.