البديل النهائي للميكروباصات على الطريق الدائري بعد تطويره، الأتوبيس الترددي BRT هيكون طفرة في النقل البري في مصر، وأعلن وزير النقل الفريق كامل الوزير في يوم 4 نوفمبر عن بدء التجهيز لتشغيل الأتوبيس الترددي في خط سير (مطار القاهرة- محطة مترو عدلي منصور). إيه مميزات الأتوبيس الترددي وهيتم تشغيله رسميًا امتى؟
بعد الانتهاء من تجديدات الطريق الدائري، هيتم منع سير الميكروباص عليه في النصف الأول من 2022 وتحديدًا في بداية شهر يناير المقبل، ومش هيتم السماح لأي ميكروباص بالسير على الدائري بعد تطويره، وهيكون الأتوبيس الترددي هو البديل عنه رسميًا، وبيتم تخصيص وإنشاء حارات ومسارات ومحطات الأتوبيسات الترددية على الطريق الدائري.
الأتوبيسات الترددية مخطط سيرها على الدائري حول القاهرة الكبرى بعد انتهاء خطة توسيع الطريق وتطويره اللي بتنفذها الدولة حاليًا، والأتوبيسات دي عبارة عن حافلات كبيرة بتعمل بالكهرباء، وبتمثل نظام نقل عام مرن ومتكامل بيوفر خدمة سريعة وآمنة وبتقدم مستوى عالي من الخدمات، وتم تسميتها “ترددية” لإنها بتسير بترددات تصل لدقائق معدودة ومميزاتها وآلية تشغيلها بسيطة ومهمة.
هيتم إنشاء 20 محطة انتظار بطول الطريق الدائري علشان تكون مراكز ركوب الأتوبيسات الترددية، وهيتم ربط محطات انتظار الأتوبيسات الترددية بمواقف الأقاليم اللي هيتم إنشاءها في مناطق تقاطع الدائري مع الطرق الرئيسية. الأتوبيسات الترددية هتمشي في مسارات منعزلة خاصة بيها على الطريق الدائري، ومن المخطط إنشاء سلالم كهربائية للصعود والنزول من محطة انتظار الأتوبيسات الترددية.
متحمسين نشوف تأثير الخطوة الكبيرة والمهمة دي في شوارع مصر وزحمتها، وتسهيلها للتنقل من مكان للتاني من غير قلق وبأمان.