بواسطة نيره عبدالعزيز.
بعد كتير من الدراسات والأبحاث في كيفية استخدام مياه البحر في الزراعة والتنمية لمدة خمس سنين، أعلنت وزارة البيئة والمياه والزراعة السعودية عن نجاح المشروع البحثي للزراعة باستخدام مياه البحر في المملكة العربية السعودية.
المشروع تمكن من خلال البحث العلمي إنه يساهم في تقليل هدر المياه وتكلفة الطاقة في الزراعة وإنتاج الأسماك، وده عن طريق استخدام نظام مغلق التدوير لمياه البحر وبيتم الإعتماد عليه بصورة كاملة في الزراعة، وبكده تبقى السعودية أول دولة في المنطقة العربية تنجح في المشروع البحثي ده، اللي هيساهم بشكل كبير في التنمية الزراعية في المناطق الساحلية، وكمان ده هيعزز كفاءة الإنتاج الزراعي وإنتاج الأسماك.
وبالفعل تم نجاح التجارب في زراعة الطماطم والخس والفلفل الأخضر والنعناع والريحان، وإنتاج نوعين كمان من الأسماك وهما البرومندي والبلطي.
بنجاح المشروع ده، هتتحل مشاكل كتير كانت بتهدد الأمن المائي والغذائي في السعودية، لإن الجو هناك بيتسم بالحرارة والجفاف، بالذات في المرتفعات الجنوبية الغربية، وده بيخلي التبخر يتحكم في حركة مياه الأمطار. فالزراعة هناك شئ مش سهل، وبيأثر في نجاح المحصول نوعية التربة اللي بتستقبل نزول المطر، اللي في الأساس نادر الحدوث، وده اللي شجع الحكومة لإتخاذ تدابير للحد من لااستنزاف الموارد المائية المرتبطة بشكل كبير بالزراعة.
المشروع استخدم تلات أنظمة للزراعة، وهي: الزراعة التقليدية المحمية، والزراعة المائية (الهيدروبونيك)، والزراعة التكاملية (الأكوابونيك)، والأبحاث والتجارب لسه مستمرة، ومتوقع إن ده هيعمل نقلة نوعية في السعودية خلال السنوات القليلة المقبلة، واستغلال مياه البحر بشكل أحسن، خصوصًا إن السعودية بتمتلك موقع جغرافي يساعدها على ده من خلال إنها بتطل على بحرين شرقًا وغربًا، بحر العرب في الشرق والبحر الأحمر في الغرب.