يوم 29 من شهر سبتمبر بيوافق اليوم العالمي للقلب، وعلشان لازم كلنا نساهم في شفاء مرضى القلب والتوعية بضرورة الاهتمام بصحة القلب ولو بشكل بسيط، قررت مؤسسة مجدي يعقوب للقلب بالتعاون مع كايرو رانرز “Cairo Runners” إنهم يتيحوا لكل الناس فرصة المشاركة في عمل خير وصحي في نفس الوقت، عن طريق إطلاق أول ماراثون افتراضي واللي هيبدأ من بكره 25 لـ 29 من الشهر الجاري، تحت اسم “Virtual Heart Run” واللي هتروح كل عائداته لمؤسسة مجدي يعقوب.
للي ميعرفش إيه هو الماراثون الافتراضي، فهو بيبقي مختلف عن التقليدي في إنه مفيش وقت معين ومسار ثابت اللي بيكون على هيئة سباق، الناس بتتجمع وتجري فيه في نفس الوقت. ولكن بيقدر المشارك إنه يختار الوقت والمكان المناسب بالنسباله إنه يجري فيه، وبالسرعة اللي هو عايزها، وله كمان الحق إنه يختار يقطع المسافات المحددة كلها في يوم واحد، أو يقسمهم علي مدار الخمس أيام اللي هي مدة الماراثون الرسمية. وده بيدي فرصة لناس من أعمار ولياقات بدنية مختلفة إنهم يكونوا جزء من الماراثون، لإنهم مش محكومين بسرعة ولا وقت معين يخلصوا فيهم الكيلومترات، المهم بس يكون قبل يوم 29 وإنك تحسب وتتابع التقدم بتاعك في الجري وتقيدوا من خلال حساب كايرو رانرز علي تطبيق Strava Club App.
بينقسم الماراثون إلى ثلاثة مسافات مختلفة تشمل 10 كم، و21 كم، و42 كم، و هيتم التبرع بثمن التذاكر المخصصة لكل سباق واللي بتتراوح من 200 و250 و300 جنيه مصري حسب المسافة اللي جريوها، لصالح مؤسسة مجدي يعقوب لإنقاذ أكبر عدد ممكن من مرضى القلب، والمساهمة كمان في بناء مركز مجدي يعقوب العالمي للقلب في القاهرة. أما بالنسبة للمشاركين في الماراثون، فبيحصل كل فائز منهم علي ميدالية بالمسافة اللي اجتازها بعد تسجيل المسافة المطلوبة من خلال التطبيق، وده بالتعاون مع شركة Edita، وDHL والبنك التجارى الدولى.
سواء كنت من الرياضيين اللي بيدخلوا بطولات دولية أو حتي من الناس اللي قليلة الحركة وبتقضي يومهم على السرير، فالمراثون ده للجميع وبيرحب بكل وأي حد بيتجمع مع غيره على هدف راقي وإنساني بيهدف لمساعدة الغير. فالماراثون ده هيديلك الفرصة إنك تغير من نمط حياتك وتتجه لأسلوب حياة صحي أكتر وفي نفس الوقت تحس بقيمة كبيرة وإنت بتتبرع وبتساعد غيرك فإن وجع قلبه يخف. لو عايز تسجل وتتشترك، النهارده آخر فرصة، والتسجيل بيبقى من خلال موقع كايرو رانرز.