بقى في حالة انتعاش فني ملحوظ في الفترة الأخيرة، فشوفنا بروموهات لمسلسلات وأفلام مختلفة كان أخرهم لنيللي كريم في برنامجها مع المدفعجية ومينا مسعود في فيلمه المصري في عز الضهر.. ولسه إمبارح شايفين بوستر جديد لفيلم قمر 14 اللي من المقرر ينزل في السينمات في صيف 2021 واللي من بطولة مجموعة كبيرة جدًا من النجوم المصريين.. ولكن الفيلم ده بالتحديد ورغم عدم وجود معلومات كتير نقدر نستشف منها إيه هيكون طبيعة الفيلم، ولكننا قدرنا نتخيل عدة أسباب ليه ممكن يكون الفيلم ده من أهم الأفلام اللي هنشوفها الفترة اللي جاية، وليه من دلوقتي بقى عندنا شغف وحماس إننا نتفرج عليه.
وجود قصص منفصلة – متصلة
مؤخرًا بدأنا نشوف أعمال سينمائية زيّ فيلم الكنز أو هيبتا اللي بنشوف فيها مجموعة من القصص المنفصلة، اللي بتجمع بينهم خيوط بنشوفها وسط السطور في المشاهد.. والحقيقة إن طريقة التناول للمواضيع بالشكل ده لفت نظر كتير من الناس وعجبهم لإنه بدأ يقلل الملل أثناء المشاهدة وكمان خلى القصص اللي بيتم تناولها تبقى قصيرة ومباشرة بدل عملية التطويل اللي بتتم في كتير من الأحيان أو زيّ ما بنقول “الحشو الزائد” اللي بيفقد العمل عنصر التشويق. لكن فيلم قمر 14، من المفترض إنه يتناول 5 قصص منفصلة ولكنها بتتصل في الآخر ببعض، وده اللي مخلينا متوسمين خير بالفيلم، ومتشوقين نشوف هيقدروا يتناولوا الحبكة الدرامية للقصص دي إزاي.
تقسيمة الكابلز الغير متوقعة
طبعًا مش محتاجين نقول إن مجموعة النجوم المشاركة في العمل كبيرة جدًا لدرجة إنها فعلًا تكفي إن الشخص يروح السينما ويدفع فلوس علشان يتفرج عليهم.. ففنانين وفنانات كبار زيّ غادة عادل، شيرين رضا، أحمد الفيشاوي، ياسمين رئيس، خالد النبوي، أحمد مالك، أحمد حاتم، أسماء أبو اليزيد، خالد أنور، مي الغيطي وغيرهم من الفنانين المشاركين أسماء لا يستهان بيها أبدًا.. ولكن المختلف هنا هو اختيار “الكابلز” اللي ممكن يكون مش معتاد أو ماكناش نتوقع إن دول هما اللي هيجتمعوا سوا كثنائي.. فمن خلال البوستر الرسمي قدرنا نشوف إن شيرين رضا هتجتمع بخالد النبوي وغادة عادل هتبقى مع خالد أنور.. ده غير بقية الثنائيات اللي تقريبًا هنتفرج عليهم مع بعض لأول مرة. ودي لافتة قوية ومختلفة إننا نشوف كابلز من أجيال مختلفة، مش النوع التقليدي اللي إحنا متعودين عليه.
قصة الفيلم المختلفة
لإننا حقيقي زهقنا من قصص الأفلام التقليدية زيّ مثلًا القصص الرومانسية اللي بيبقى فيها الثنائي مش عارف يجتمع، وبعدها نشوف التصاعد المتوقع في الأحداث.. فإحنا سعداء إن قصة الفيلم ده هتكون مختلفة، فزي ما سمعنا الفيلم هيتناول فكرة تأثير ليلة 14 من الشهر لما القمر بيكتمل على العلاقات الإنسانية.. واللي بصراحة إحنا شايفين إنها فكرة جديدة ومختلفة تستحق المشاهدة وفعلًا نحب إننا نعرفها.. ولا إيه؟
آخر كلمة: ماتفوتوش قراءة: “كوفيد 25؟ يوسف الشريف وجدل جديد حول اختيار اسم مسلسله لسباق رمضان 2021“.