قولولنا إيه الـ”هيتايا”؟ نيللي كريم والمدفعجية في عمل غامض قريبًا

لازم قبل أي برنامج، فيلم، مسلسل أو أي عمل في العموم، يروج ليها أصحاب العمل بطرق مختلفة، سواء كان ببرومو تشويقي، صور أو غيره. ولكن المرة دي طريقة استعمال عنصر “التشويق” كانت مختلفة وجديدة! نشرت إمبارح الفنانة نيللي كريم 3 بوسترات مختلفة بتروج فيها لعمل جديد.. وفي كل بوستر كان تخمين مختلف لإيه هي طبيعة العمل الجديد اللي هيكون باسم “الهيتايا” بالاشتراك مع المدفعجية.. ولكننا مانعرفش إذا كان برنامج طبيخ ولا كورة، ولا مسرحية! والحقيقة لإننا مانعرفش الإجابة، فجمعنالكم هنا كل المعلومات علشان انتوا اللي تلاقوا الإجابة بنفسكم!

بعد ما تعاون المدفعجية مع نيللي كريم بطريقة غير مباشرة عن طريق أغنية مسلسلها في رمضان اللي فات “بـ 100 وش”، هيتجمعوا تاني في عمل إحنا مانعرفش طبيعته إيه لحد النهارده، بس اللي متأكدين منه إن نيللي والمدفعجية مش هيتجمعوا في عمل إلا ويطلعولنا حاجة كبيرة! فقبل ما تنشر نيللي البوسترات التشويقية، كان نزل ديزل برومو للعمل، وكمان صور من الكواليس، اللي بان فيها أجواء البهجة من قبل حتى ما نعرف هما بيعملوا إيه في اللوكيشن!

المعلومات اللي إداها فريق العمل للناس مش كتير، ولكن هل قدرتوا من البرومو والصور إنكم تعرفوا أي حاجة أو تخمنوا إيه هي حكاية الهيتايا؟ لو عندكم أي فكرة إيه ممكن تكون طبيعة العمل وإذا كان برنامج طبخ ولا كورة ولا مسلسل أو حتى لو في الآخر مش هيبقى ولا حاجة من دول.. عرفونا وقولونا في التعليقات. وبما إن مفيش أي معلومة مؤكدة، فالمعلومة الوحيدة اللي نقدر نقولها بثقة هو إننا متشوقين للعمل من دلوقتي!

آخر كلمة: ماتفوتوش قراءة: “الأمل يبدأ معنا: مبادرة جديدة بتشارك فيها نيللي كريم لدعم النساء الناجيات من العنف“.

تعليقات
Loading...