أولمبياد طوكيو الصيفية لسنة 2020 كان حدث العالم كله في إنتظاره على أحر من جمر، خصوصًا بعد المنافسات والمباريات المؤهلة ليه في 2019، اللي كتير مننا تابعها بشغف وترقب، لكن للأسف بسبب فيروس كورونا المستجد والجائحة الناتجة عنه، تم تأجيل الحدث العالمي الرياضي لأجل غير مسمى، وتمر الأيام والشهور، ومشجعي الرياضات المختلفة مستنيين أي إعلان، لحد ما أخيرًا تم تحديد صيف 2021، في الأيام ما بين 23 يوليو و11 أغسطس 2021 لإجراء المنافسات في بيئة آمنة هيتم تطبيق فيها كل الإجرائات الاحترازية لمواجهة مخاطر الفيروس.
بالنسبة لمصر، السنة دي هتكون مختلفة لإن مصر محضرة أكبر وفد رياضي للأولمبياد من ساعة بدأ مشاركتها في الحدث الرياضي. في أولمبياد طوكيو منتخب مصر هيشارك في 24 رياضة مختلفة منها القوس والسهم وكرة القدم وركوب الدراجات والجمباز. حتى الآن، شريف عريان، السكرتير العام للجنة الأولمبية، وضح إن المنتخب المصري فيه أكتر من 134 رياضي، واحتمال يزيد العدد ده لـ 140 بحلول يوم 28 يونيو.
ولإن ده هو أكبر منتخب مصري من حيث العدد في التاريخ، فالعريان متوقع إننا نقدر يا نحافظ على رقم الميداليات اللي حققناه في أوليمبياد ريو 2016، يا نكسره بفرق. ووضح شريف العريان بإن هدف اللجنة الأولمبية كل عام هو تسهيل مشاركة أكبر عدد من الرياضيين المصريين في الرياضات المختلفة كل سنة، لكن الفوز والخسارة دايمًا بيعتمد على مستوى اللاعب وأدائه أو أدائها.
للأسف السنة دي، منتخب مصر لرفع الأثقال مش هيشارك وده بسبب منعه على إيد الاتحاد الدولي لرفع الأثقال بعد ما ثبت تلقي الرياضيين المصريين لمنشطات أثناء مشاركتهم في الألعاب الإفريقية للشباب، المنع ده اتطبق على رياضيين كتير منهم سارة سمير ومحمد إيهاب، اللي أحرزوا ميداليات ذهبية في مشاركات سابقة.