أعلنت وزارة السياحة والآثار المصرية إنه خلال الـ 60 يوم الجايين هيتم افتتاح مجموعة كبيرة من المتاحف والمواقع الآثرية، إما لأول مرة أو بعد فترات طويلة من أعمال الإصلاح والترميم. عدد المواقع اللي أعلنت عنها الوزارة تسعة وهي: قصر البارون إمبان في مصر الجديدة، متحف شرم الشيخ، متحف كفر الشيخ، متحف الحضارة المصرية في الفسطاط، متحف المركبات الملكية في بولاق، ميدان التحرير، موكب المومياوات الملكية، متحف العاصمة الإدارية الجديدة، ومتحف المطار.
إحنا جمعنالكم قائمة بكل المعلومات اللي محتاجين تعرفوها عن أهم المواقع دي والمعروضات اللي هتكون فيها.
قصر البارون إمبان في مصر الجديدة
بعد سنتين من أعمال التطوير والترميم التي بلغت تكلفتها 100 مليون جنيه مصري تم إعادة تأهيل قصر البارون إمبان في حي مصر الجديدة علشان يكون معرض بيحكي تاريخ المنطقة عبر العصور المختلفة. اتبنى القصر على إيد المليونير البلجيكي، ادوارد إمبان، سنة 1911، وهو مستوحى في بناءه من العمارة الهندية. بيعتبر قصر البارون واحد من أبرز معالم حي مصر الجديدة اللي كانت مهملة بشكل كبير الفترة اللي فاتت.
القصر اتغير بشكل كامل بعد التجديد زي إنه بقى فيه مثلاً شاشات عرض المالتيميديا اللي هتعرض صور وأفلام وثائقية عن مظاهر الحياة المختلفة في مصر الجديدة، وكمان هيتم عرض صور للبارون امبان نفسه وشريكه نوبار باشا، والمهندس الفرنسي ألكسندر مارسيل الذي قام بتصميم القصر، وده بالإضافة لعربية الترام والسيارات القديمة اللي بقت موجودة في حديقة القصر، ومناطق خدمات الزائرين.
وعلى الرغم من إن وزارة الآثار لسة محطتش معاد محدد لافتتاح القصر، إلا إنها نشرت على صفاحتها الرسمية على السوشيال ميديا فيديو تشويقي بيبن جماله بعد التجديد، وبيزود من تشويقنا لزيارته.
متحف شرم الشيخ الجديد
متحف شرم الشيخ موجود على طريق المطار، وهو بيتكون من 6 صالات عرض، وقاعة للمؤتمرات، وبدروم، وعدد من محلات الحرف التراثية، ومسرح مكشوف، وعدد من المطاعم.
المتحف هيتم افتتاحه بشكل جزئي الفترة اللي جاية، وهو بيتسع لعرض 20 ألف قطعة أثرية من الآثار الفرعونية والإسلامية والقبطية. والمعروضات في المتحف هتعكس مظاهر الحياة اليومية عند المصرييين على مر العصور، وهيكون في عرض لقطع نادرة زي العرض الضخم اللي هيضم لأول مرة أشكال من الحيوانات والطيور.
قاعة المتحف الأولى بتضم حوالي 700 قطعة أثرية، والقاعة الثانية 500 قطعة، واستقبل المتحف مؤخراً ثلاث قطع أثرية كبيرة من المتحف المصري بالتحرير، شملت القطع دي مركبتي دهشور الخشبية، وتمثال قرد البابون اللي واقف في وضع التهليل لشروق الشمس. المراكب دي يبلغ طولها أكثر من 10 أمتار وعرضها 2.3 م، وهي بتخص الملك سنوسرت الثالث من الدولة الوسطى، وهيتم عرض القطع دي في قاعة مخصصة ليها جوا المتحف.
متحف الحضارة المصرية في الفسطاط
متحف الحضارة المصرية هو واحد من أهم المشروعات الآثرية اللي تمت مؤخراً بالتعاون مع اليونسكو، والمتحف ده هو واحد من أكبر متاحف الحضارة في الشرق الأوسط، وعن طريقه هيتم عرض رؤية جديدة للتراث المصري.
بيضم المتحف جميع مظاهر الثراء والتنوع في حضارة المصرية من أول عصر ما قبل التاريخ لحد وقتنا الحالي، وقاعة العرض الرئيسية هيكون فيها مجموعة متنوعة من القطع الأثرية زي نماذج لمجموعات تماثيل الخدم من الدولة القديمة ، ومجموعة الكاهن سنجم من عصر الدولة الحديثة، ونسخة من كتاب الموتى من العصر المتأخر، وحوالي ٥٠ مشكاة من العصرالاسلامي.
ومع قرب افتتاح المتحف، بتستعد حالياً وزارة السياحة والآثار المصرية لنقل مجموعة من المومياوات الملكية من المتحف المصري بالتحرير ليه، وعملية النقل دي هتكون في موكب ملكي مهيب علشان تتعرض في قاعة عرض خاصة بيها.
متحف مطار القاهرة الدولي
بيستعد حالياً مطار القاهرة الدولي لفتح متحف صغير جواه، والمتحف ده هيبقى فيه أكتر من 90 قطعة أثرية من مختلف العصور في مصر.
المتحف هيكون في صالة السفر في مبنى الركاب رقم 3، وتم نقل مؤخراً ليه 12 قطعة آثرية تضمنت ثلاث مومياوات مزينة بكرتوناج مذهب، ورسومات ملونة كانت في مخازن المتحف المصري بالتحرير، وده بالإضافة لمجموعة من الأواني الكانوبية، وتمثال للاله ايزيس المجنح مصنوع من البرونز، وتماثيل صغيره من العصرين اليوناني والروماني من متحف السويس القومي.
المتحف ده هيمثل معلم سياحي لركاب الترانزيت بمطار القاهرة الدولى، والهدف من إنشاءه هو جذب السياح وتشجيعهم على مشاهدة أكبر عدد ممكن من الآثار المصرية. وأعلنت وزارة السياحة مؤخراً، إنه جاري العمل جوا صالة 2 بالمطار على إنشاء متحف تاني بمساحة 150م.
متحف كفر الشيخ
بيقع المتحف جمب جامعة كفر الشيخ على مساحة أكبر من 6 ألاف متر مربع، وبيضم مجموعة من قاعات العرض والمرافق المختلفة زي قاعة بوتو أهم قاعات المتحف اللي بتضم نتائج أعمال الاكتشافات الأثرية من العصور المختلفة ومنطقة آثار تل الفراعين. وكمان المتحف فيه قاعة رئيسية للعرض بتضم قاعات أصغر متقسمة حسب العصور التاريخية المختلفة، بما فيها عصر الأسر الفرعونية والعصرين اليونانى والرومانى، بالإضافة إلى عصور الحكم البيزنطى والقبطى والإسلامى.
المتحف ده هيسلط الضوء على أهمية وفضل وتأثير الحضارة المصرية القديمة على العلوم المختلفة زي الطب والصيدلة والهندسة والفلك والزراعة، وهتتناول القطع عرض تاريخ كل العلوم دي زمان و اللي بيقابلهم في العصر الحديث.
متحف العاصمة الإدارية الجديدة
ومن المواقع اللي بتستعد الوزارة على قدم وساق لفتحها هو المتحف المصري في مدينة الثقافة والفنون بالعاصمة الإدارية الجديدة. المتحف ده هيحكي تاريخ العواصم المصرية على مر العصور، وهو بيتكون من قاعة رئيسية فيها آثار لتسع عواصم من مصر القديمة والحديثة من أول منف، وطيبة، للفسطاط، والقاهرة الخديوية.
المستوى الثانى للمتحف موجود ورا تمثال الملك رمسيس الثانى اللي محطوط هناك، وهو بيخص العاصمة الإدارية وهيتعرض في القاعة دي مجموعة من المقتنيات المختلفة الي بتمثل أنماط الحياة فى كل حقبة تاريخية خاصة بكل عاصمة لوحدها زي أدوات الزينة، وادوات الحرب والقتال، ونظام الحكم والمكاتبات المختلفة.
والمتحف بيضم قسم تاني عبارة عن جناح بيمثل العالم الاخر عند المصرى القديم، وبيتكون الجزء ده من مقبرة توتو بالإضافة إلى قاعة مومياوات، وتوابيت، وفتارين بتحتوى على الأوانى الكانوبية، ومجموعة من الأبواب الوهمية، ورؤوس بديلة بتحاكى الطقوس الدينية فى مصر القديمة.