من أكتر الحاجات اللي بتوجع وتأثر في مشاعرنا كناس، هي مفارقة للحيوانات الأليفة اللي مربينها، فهما بيكونوا أصحابنا، وأطفالنا، وجزء من العيلة، وفراقهم بيكون صعب زيهم زيّ معارفنا من الناس لما نفارقهم.. بتعدي علينا أيام صعبة جدًا لما يموتوا، ولكن اللي بيكون أصعب لما نكون مضطرين نتخلى عنهم لأسباب أكبر مننا وبرا عن ايدينا، زيّ الظروف المادية اللي بتخلينا مش قادرين نشيل تكاليفهم، أو ممكن يكون في حد من أفراد العيلة عنده حساسية من الكائن ده، بس السبب اللي هنتكلم عنه النهارده هو بسبب الحرب.
في سوريا الناس اضطرت تسيب حيواناتها الأليفة هناك ويهاجروا ويلجأوا في أراضي غريبة ولكن غصب عنهم ماقدروش ياخدوهم معاهم، ولكن مؤسسة كات كونكت برئاسة رؤى الكيلاني، هي مؤسسة هولندية غير ربحية قررت تجمع الناس دي بحيواناتها الأليفة اللي سابوهم في سوريا.
اقرا كمان: تسميم كلاب وقطط شوارع المعادي.. لحد امتى؟
المؤسسة مش بتجمعهم ببعض بس، دا كمان بتوفر للحيوانات الأليفة في سوريا الدوا والرعاية، ومكان للتبني كمان في حالة لو مالقوش صاحب الحيوان ده.
رؤى بتعمل كل اللي تقدر عليه علشان تساعد الحيوانات دي، من غير ما تكسب حاجة من ورا الموضوع، وهيكون من أجمل الحاجات اللي عملتوها لو ساعدتوها.