بنحب نخرج نشرب حاجة أو ناكل حاجة ونتمشى وبيبقى نفسنا ناخد معانا حيواناتنا الأليفة سواء قطط أو كلاب، وفي الغالب الخروجة بتاعتهم بتقتصر على إننا نمشيهم في الشارع أو الجنينة بس، لكن ساعات بيبقى نفسنا نخرج بيهم في أماكن وده طبعًا مش بيكون متاح وأغلب الأماكن بترفض وجود حيوانات، لكن دلوقتي بقى في كافيهات صديقة للكلاب والقطط وبتسمح بوجودهم سواء كانوا الحيوانات الأليفة بتاعتك، أو كمان حيوانات موجودة في الكافيه نفسه وتقدر تلعب معاهم وتستمتع بوقتك ومشروبك المفضل وانت بتلعب معاهم، والفكرة انتشرت في الوطن العربي مش بس في مصر، تعالوا نشوف إيه الكافيهات دي وموجودة فين.
Pets Corner
أول كافيه بيسمح بوجود كلاب وقطط في مصر، موجود في الأسكندرية، في سموحة، بيسمحلك بوجود حيوانك الأليف معاك في الكافيه علشان تستمتع بوقتك ومشروبك المفضل وفي نفس الوقت تجيب معاك الكلب أو القطة بتاعتك تفسحها.
Parking Lot
الأول من نوعه في السعودية، في مدينة الخُبر، كافيه بيتيح لأصحاب الكلاب في السعودية التمتع بشرب فنجان قهوة برا البيت مع حيواناتهم، فكرته جت لما صاحبة المكان دلال أحمد زارت السعودية واتمنعت من التمشية على الشاطئ مع كلبها، ولقت إن مفيش أماكن كتير بتسمح باصطحاب الحيوانات الأليفة فقررت تفتتح أول كافيه صديق للحيوانات في المملكة العربية السعودية.
Luna & Beau
مش بس أول كافيه فيه حيوانات أليفة في الكويت، ده كمان مشروع لرعاية الحيوانات والعناية بيهم، متدلعين فيه كده زيّ ما انت شايف في الصور.
ايلورومنيا
عن: العين الإخبارية ![]()
عن: العين الإخبارية
في دبي، كافيه لمحبي القطط بالذات حتى اسم الكافيه اللي يبان غريب، فهو معناه حب القطط باللغة اليونانية، تقدر تروح هناك تلعب مع مجموعة قطط موجودة في الكافيه وبيتم رعايتهم، وانت بتشرب قهوتك تتدلع عليك القطط وتنسى أحزانك.