لمدة يومين، ١١ و١٢ من مارس، بتُقام (قمة تكني – Techne summit) في المتحف القومي للحضارة المصرية. القمة هتستمر أربع أسابيع، ما بين ١٦ محافظة في مصر، لدعم الاستثمار وريادة الأعمال، عن طريق تشجيع الابتكار من خلال نهج بتتعاون فيه قطاعات مختلفة؛ زيّ مجالات التكنولوجيا والأعمال، وبيشارك في تنميته رجال الأعمال والمستثمرين والمبدعين.
في سنة ٢٠٢٢، حضر القمة أكتر من ١٣ ألف شخص، وحوالي ٣٠٠ شركة ناشئة، و٣٠ متحدث، بهدف ربط إفريقيا وأوروبا بالشرق الأوسط، من خلال مناقشات وورش عمل مع شركات بتعرض أحدث التقنيات في العالم.
بتركز القمة على مناقشة عقبات الاستثمار والابتكار، وتقديم النصائح والبيانات الضرورية رواد الأعمال والابتكار التقني علشان يتخطوا العقبات الأولية في شغلهم. بيقول المهندس أحمد زاهر، المدير التنفيذي لشركة (إيتيدا – ITIDA) خلال كلامه في واحدة من المناقشات النهارده، إن نجاح القمة السنة اللي فاتت كان مُشجع جدًا لتوسعها وزيادة طموحها السنة دي.
أما طارق القاضي، رئيس شركة (ميديتريان أنجيل إنفيستورز – Mediterrean Angel Investors)، ناقش العقبات اللي ممكن تواجه الشركات الناشئة النهارده في ظل الأزمة الاقتصادية العالمية، ومشكلة نقص الدولار، ولكن أكد إن مصر كدولة بتقدم كل التسهيلات والمساعدات اللازمة لأصحاب الأعمال الناشئة علشان يتخطوا المشكلة دي بسهولة.