في واحدة من مناقشات اليوم الأول من قمة تكني للتكنولوجيا والأعمال، في المتحف القومي للحضارة، اجتمع رواد الأعمال أمير حسن، مدير تسويق إلكتروني في شركة (فيليبس – Philips)، وعمر مرعي، مدير تسويق في شركة طلبات، وعز طارق شريك مؤسس في شركة (إن يور شو – In Your Shoe)، وأحمد دويدار شريك مؤسس في شركة خزنلي، وأدار النقاش ما بينهم محمد سلامة مُقدم بودكاست (التجارة والبزنس – State of E-commerce podcast).
دارت المناقشة عن النجاحات اللي حققتها الشركات الأربعة في السوق المصري، والعقبات اللي واجهتها كل شركة في طريقها وازاي قدرت تتغلب عليها.
اتلكم عز طارق عن منتجات إن يور شو، وازاي الشركة هدفها هو توفير منتج جاذب للشباب ومُستلهم من اهتماماتهم، ووضح إن منصات التواصل الاجتماعي واحدة من الوسائل اللي بيستخدموها علشان يعرفوا اهتمامات عملائهم، من خلال متابعة منشوراتهم اللي بيعرفوا من خلالها إيه المنتجات اللي بتعجبهم واللي مش موجودة في مصر.
وأكد طارق إن خلق علامة تجارية يحبها العميل أهم من المنتج اللي بتقدمه العلامة التجارية، ووضح إن علشان كده منشوراتهم على منصات التواصل الاجتماعي بتحاول تحقق نوع من التواصل مع العملاء، عن طريق نشر مواد جذابة وبتركز على الحاجات اللي منتشرة (Trending) تريند في وقت محدد.
أما عمر مرعي، فوضح إن شغل طلبات في توصيل الأكل بيخلي العروض اللي بيقدموها عنصر مهم جدًا في شغلهم، وعلشان كده بيكون كل عرض متفصل بشكل مخصص للعميل علشان يجذبه لاستخدام الأبليكيشن أكتر، وطرح مثال على ده العرض اللي شاركوا منصة شاهد فيه، واللي قدم قسيمة تخفيض للمنصة مع كل طلب من طلبات.
بيقول مرعي: “لما بنطلب أكل بنبقى عايزين نتفرج على التلفزيون ونروق، وعلشان كده كان تعاوننا مع شاهد، علشان نقدم للعميل كل احتياجاته في طلب واحد”.
اتكلم رواد الأعمال الأربعة عن أهمية عامل التوصيل لهم، كشركات بتعتمد على التوصيل للعميل بشكل كامل، وأكدوا إن عامل التوصيل بيمثل واجهة الشركة قدام العميل، وعلشان كده لازم يتابعوا مع العميل علشان يتأكدوا إن تجربة التوصيل كان على أفضل مستوى.