في شوية قلق وحوارات شغالين بقالهم شوية صغيريين بين الملياردير إيلون ماسك والأمير السعودي الوليد ابن طلال، كل واحد عمال يرد على التاني بتويتة “قصف جبهة” والعالم عمال يتفرج عليهم.. طب الموضوع بدأ ازاي؟
إيلون ماسك عايز يشتري تويتر
إيلون ماسك من عشاق تويتر وبيحب يستخدمه ويتفاعل مع المغردين عليه، وقال قبل كده إنه كان نفسه يخلي تويتر منصة أكتر شفافية وانفتاحًا لحرية التعبير.
ولو فاكرين هنلاقي إن قبل كده اشترى 9% من شركة تويتر بس رفض إنه ينضم لمجلس الإدارة في آخر لحظة، ودلوقتي قرر إنه يشتري كل الأسهم الباقية بقيمة 43 مليار دولار ويبقى هو الأمر الناهي لمنصة تويتر كلها.
الوليد بن طلال: مش موافق
الأمير الوليد بن طلال كان رفع حصته قبل كده في تويتر لـ5.2% يعني بقيمة 3.57 مليار دولار في 2015، وبصفته واحد من أكبر وأطول المستثمرين مدة في تويتر، كتب على صفحته وقال إن العرض اللي قال عليه إيلون ماسك واللي قيمته 54 دولار للسهم، مش بيقترب للسعر الحقيقي لتويتر وباعتباري واحد من أكبر المساهمين … فأنا أرفض العرض، طب وإيلون ماسك يسكتلوا؟ لأ طبعًا..
رد وقاله عندي سؤالين لو سمحت ليا، هي المملكة بتمتلك قد إيه من تويتر بشكل مباشر وبشكل غير مباشر؟ وسؤالي التاني إيه وجهة نظر المملكة في حرية التعبير الصحفي؟
بعيدًا عن إنها خناقة أغنيا في بعض، تويتر هتقرر إيه؟ هتقبل العرض ولا لأ؟
أكدت دونا هيتسشيريتش، كبيرة المحاضرين في كلية كولومبيا للأعمال لـ CNN: إن مجلس الإدارة عنده تلات اختيارات إما يرفض العرض أو يتفاوض مع ماسك بخصوص السعر أو إنهم يجيبوا شخص تاني، ومع كل الاختيارات دي الأكيد إن هيبقى في اضطرابات الفترة اللي جاية.
وفي خطة تانية الشركة ممكن تلجأ لها وهي “الحبة السامة” وده تكنيك بيتم استخدامه للحفاظ على حق المساهمين بمنع الطرف المنافس إنه يشتري أسهم بخصم كبير وبالتالي هيم إضعاف حصته في الشركة، عن طريق حظر شراء أكتر من 15% للمالك الواحد، وده هيتحقق من خلال توفير فرص قدام المستثمرين إنهم يشتروا أسهم بسعر منخفض.
طب هو العرض مغري أصلًا ولا لأ؟
في خبراء بيقولوا إن العرض كويس ويستحق التفكير والقبول كمان، لإن قيمة السهم بـ54.20 دولار بزيادة بنسبة 18% عن سعر الإغلاق يوم الأربع وأعلى بنسبة 38% من سعر الإغلاق في اليوم الأول من أبريل.. وبعيدًا عن إنهم هيوافقوا ولا لأ، إيلون واضح إنه مقرر خطط بديلة في حالة رفض عرضه، منها إعادة التفكير في كونه مساهم أصلًا للشركة.. مستنيين نشوف إيه اللي هيحصل الأيام اللي جاية.