قصة اعتذار روبرت دي نيرو لأحمد زكي في مهرجان موسكو والاعتراف بموهبته الفذة
بملامح سمراء تشبه أرض بلاده، وموهبة متفجرة، وطموح سينمائي عالي حقق أحمد زكي الخلطة السحرية وقدر يجمع ما بين حب النقاد وعشق الجمهور، وبقى واحد من أهم نجوم الشباك في التمانينات والتسعينات.
![أحمد زكي](https://ar.scoopempire.com/wp-content/uploads/sites/4/2021/11/أحمد-زكي-مع-روبرت-دي-نيرو-1.jpg)
بقدرات تمثيلية مبهرة قدم زكي طيف واسع من الأدوار السينمائية المميزة، اللي عبرت عن كل أطياف البشر، مش بس الشعب المصري. عمل دور البواب الصعيدي في “البيه البواب”، وعسكري الجيش في “البريء”، ورئيس الجمهورية في “ناصر 56” و”أيام السادات”، وظابط الشرطة السيكوباتي اللي بيستغل سلطته في “زوجة رجل مهم”، وهو الدور اللي خلى ممثل عالمي زيّ روبرت دي نيرو يعترف بموهبته العبقرية.
في برنامج “بهدوء” على قناة “سي بي سي” بيحكي الإعلامي عماد الدين أديب إن الممثل العالمي روبرت دي نيرو قابل أحمد زكي في مهرجان موسكو بعد عرض فيلم “زوجة رجل مهم”.
كان دي نيرو عضو في لجنة تحكيم المهرجان، وبعد ختام فعاليات المهرجان وتوزيع الجوايز اجتمع مع زكي وعماد الدين أديب وباقي الوفد المصري الحاضر مع فيلم “زوجة رجل مهم”. توجه دي نيرو ناحية أحمد زكي وتأسف على إن جايزة أفضل ممثل راحت لأنتوني هوبكينز مش لزكي، وضربه على كتفه بحب وقاله إنه ممثل عظيم.
ولما سأل أديب دي نيرو عن رأيه في الفيلم قال: الفيلم رائع، فسأله أحمد زكي: هو بيقولك إيه؟، فرد عماد الدين أديب: مستر دي نيرو شاف الفيلم وعجبه، فقال دي نيرو: “الفيلم جميل، But tell him, he is a great actor”. قال أديب لزكي: بيقولك إنت ممثل عظيم.
كان أحمد زكي مش كويس في اللغة الإنجليزية ومافهمش اللي قاله دي نيرو، فوجه روبرت دي نيرو الكلام لزكي علشان يتأكد إن عماد الدين أديب ترجم كلامه بالظبط، وشاور بصباعه لصدر أحمد زكي وقال له: “You are an excellent actor”.
ضحك زكي وقال: “Excellent يعني ممتاز صح”، وبعدها فضل يتمشى وسط الوفد المصري بسعادة وفخر وهو بيقول: “بيقوللي Excellent يا ولاد الكلب”.
عبر دي نيرو للوفد المصري عن حزنه إن زكي مش بيعرف يتكلم اللغة الإنجليزية، وأكد إنها لو كانت عنده كان هيحقق نجاح عظيم في هوليوود بسرعة الصاروخ.
بيحكي القصة صناع الفيلم كتير في لقائاتهم بفخر. أحمد زكي استغرب كتير من سبب اعتذار دينيرو. كانت تكفيه كلماته ومشاهدته وإعجابه بالفيلم.
الفيلم من إخراج العظيم محمد خان وزيّ ما حكى قبل كده، الفيلم كان ثمرة تجربة شخصية مع ظابط شرط مغرور وقفه بعربيته على الطريق واتعامل معاه بطريقة مسيئة جدًا، ورغم إن خان كان ممكن ينتقم من الظابط بعلاقاته السياسية إلا إنه أكتفى بالإعتذار القانوني وفضل الإنتقام بفيلم عن عقليته السيكوباتية المغرورة.
رغم إن أسم الفيلم يوحي بإن البطلة هي زوجة الظابط “ميرفت أمين” إلا إن الحقيقة إن البطولة المطلقة في الفيلم هي لهشام، الظابط السيكوباتي المغرور اللي بيتسغل سلطاته، وشخصية الزوجة هي تفصيلة هامشية في رحلة استعلاء هشام وتجبره على كل اللي حواليه بداية من زوجته لحد المتظاهرين اللي استخدم كل الطرق الشرعية وغير الشرعية في قمع احتجاجاجتهم على سياسات السادات.
ولكن أسم الفيلم يظل “زوجة رجل مهم” في تعبير متطاول عن إنحياز سينما محمد خان للمرأة، وهي الحقيقة اللي خان فضل دايمًا فخور بيها.