النهارده هيبقى افتتاح الدورة الجديدة من مهرجان القاهرة السينمائي الدولي، ومستنيين نشوف كل الفعاليات والأحداث اللي هتحصل السنة دي، وقبل الافتتاح حابين ناخدكم في جولة سريعة كده للسنة اللي فاتت علشان نشوف أغرب الحاجات اللي حصلت في المهرجان ولفتت الأنظار في حفل الافتتاح سواء مواقف أو إطلالات غريبة من الفنانين.
الفنان أحمد داوود كان لابس قبعة مكسيكية في حفل الافتتاح، وده كان احتفال منه بضيف شرف المهرجان وهي السينما المكسيكية.
ويمكن من أغرب الحاجات اللي حصلت في افتتاح المهرجان السنة اللي فاتت، كان ظهور سما المصري بالحجاب، وده أثار جدل كبير ساعتها خصوصًا إنها دخلت الحفل من غير دعوة، فاضطرت إدارة المهرجان لطردها، وانتشرت بعدها موجة من الاتهامات ليها بالإساءة للحجاب وتعمدها للفت الأنظار، لإن الإطلالة كلها كانت غير مناسبة.
كمان الفنانة مي عمر خلعت ديل الفستان أو الجزء المكمل لفستانها اللي كان بيتكون من الريش، علشان كان وزنه تقيل ومخليها مش عارفة تتحرك بيه، فشالته في وسط الحفل وظهرت من غيره.
والمنتج الفرنسي دانيال زيسكند، كان بيهزر مع المصورين على السجادة الحمراء لمهرجان القاهرة السينمائي، وغنى كوبليه “مرجان أحمد مرجان” للزعيم عادل إمام، وده أثناء حضوره افتتاح مسابقة “آفاق السينما العربية”.