التلفزيون العربي مابيخلاش من المسلسلات، والجميل إننا بنلاقي ثقافات وممثلين من بلاد مختلفة بيشتركوا في نفس العمل، في منها الدراما والكوميدي والأكشن، واللي بتخلينا نفضل مربوطين بالمسلسل وأحداثه وأبطاله ومش عارفين نشيل عينينا من على الشاشة ونتفرج على حلقة ورا التانية، ومعظم الأعمال دي بنشوفها في رمضان اللي بنسلي صيامنا فيه مع المسلسلات دي، ولكن في كتير كمان بيكونوا على مدار السنة عادي، فجمعنالكم 10 مسلسلات اللي لازم تكونوا شوفتوها، أو حاطينها في الحسبان.
البرنس
مسلسل البرنس من بطولة محمد مضان، ونور، وروجينا، وأحمد زاهر، شوفناه في رمضان 2020 واللي عمل ضجة كبيرة والناس كلها كانت بتتفرج وبتتكلم عليه من الدراما اللي كانت دايرة في أحداثه.
حكاية حياة
مفيش شك إن أغلب مسلسلات غادة عبدالرازق بيبقى ليها قصة حلوة بتشد الناس، ومن أحلى مسلسلاتها مسلسل حكاية حياة اللي شارك معاها في البطولة أحمد زاهر، وروجينا، شوفناه في رمضان 2013، وكان مسلسل درامي جميل، أثر فينا كلنا ونهايته كانت غير متوقعة خالص.
عايزة أتجوز
مسلسل عايزة أتجوز من بطولة هند صبري وسوسن بدر شوفناه في رمضان 2010، اللي كلنا تقريبًا كنا بنتفرج عليه، ولسه بنشوفه لحد دلوقتي، فالكوميديا اللي شوفناها في المسلسل عمرها ما هتتكرر.
أماكن في القلب
مسلسل أماكن في القلب من بطولة هشام سليم، وعزت أبو عوف، وعلا غانم، والمسلسل شوفناه سنة 2005، وأبهرنا كلنا وكان بيتكلم عن دراما مأسوية بتدور في وسط علاقات العرب واليهود والأمريكان قبل وبعد أحداث 11 سبتمبر 2001.
أنا وهؤلاء
مسلسل أنا وهؤلاء من بطولة الفنان الكبير محمد صبحي وداليا مصطفى، وشوفناه سنة 2005، هو مسلسل كوميدي ودراما، بيتكلم عن الأسر وجو العائلات الجميل.
هذا المساء
لو لسه ماعرفتش “مين هاني دا” يبقى اتفرج على مسلسل هذا المساء اللي نزل سنة 2017، ومن بطولة أروى جودة، وإياد نصار، ومحمد فراج، وأحمد داوود، وهو مسلسل درامي بيتكلم عن مجموعة من الناس مترابطين بشكل ما، من ضمنهم هاني.
عائلة الحاج متولي
عائلة الحاج متولي اللي يعتبر أيقونة في عالم التلفزيون المصري، هو مسلسل كوميدي ودرامي من بطولة نور الشريف، وغادة عبد الرازق، وسمية الخشاب، وماجدة زكي، المسلسل ده معروف في كل بيت مصري أو عربي عامة، فهو جزء من الدراما المصرية اللي لازم يتشاف.
عشق النساء
هو مسلسل درامي رومانسي لبناني اتعرض سنة 2014، من بطولة باسل الخياط، ونادين نسيب، وورد الخال، وهو مستوحى من قصة حقيقية وبيتكلم عن قضايا كتير تخص المجتمع زيّ العنف الأسري والعنف ضد المرأة والإدمان.
الجماعة
الجماعة هو مسلسل درامي وتاريخي من إنتاج رمضان 2010، ومن بطولة حسن الرداد، وسوسن بدر، ويسرا اللوزي، وإياد نصار، وبيتكلم عن حياة حسن البنا من صغره لحد ما كبر.
أفراح القبة
هو مسلسل درامي من إنتاج رمضان 2016، ومن بطولة منى زكي، ورانيا يوسف، وإياد نصار، وجمال سليمان، وصبا مبارك، وهو مقتبس من رواية نجيب محفوظ اللي بنفس الاسم.