أكتر من ست سنين واحنا بنشوف مسلسلات من نوع وتيمة مختلفة وظهر معاها على الساحة مصطلح شابوه وبقى شيء طبيعي لكل أعمال يوسف الشريف إننا نقول عليها شابوه وده لأسباب كتير اتجمعت في الأعمال دي.. تعالوا نتعرف على بعضها.
تحليقها خارج السرب دايمًا ودخولها لمنطقة ماحدش بيدخلها في الأعمال المصرية والعربية، وعلى الرغم من إن التيمة في مسلسلات يوسف الشريف واحدة “الفانتزيا والخيال العلمي والرعب أحيانًا” بس بيعرف ازاي كل مرة يستغلها بالشكل اللي يطلع لنا منها في الأخر بقيمة، يعني عندك مثلًا مسلسل كفر دلهاب كان مليان بالإسقاطات السياسية والرموز اللي اتمثلت في روح ريحانة “الشبح” واللي عبرت عن روح الثورة والظلم، وأهل الكفر اللي بيسكتوا عن الحق بدافع الخوف، والطبيب المثقف اللي بيحاول يحقق العدل ويرجع الحق.
وفي مسلسل النهاية اللي عمل أعظم إسقاطة في التاريخ لما تنبأ في المسلسل بنهاية إسرائيل ورجوع اليهود لبلادهم الأصلية في أوروبا وهروبهم من فلسطين.
الديكورات والإكسسورات اللي دايمًا بتوديك في عالم تاني وعصور مختلفة، يعني عندك مثلًا في كفر دلهاب بالتصوير في مدينة الإنتاج الاعلامي ومنطقة سيوة والقلعة، قدر يوصل للعصور الوسطى، والمؤثرات البصرية اللي معمولة باحترافية في مسلسل النهاية واللي وصل بيها رسالة إن مش شرط إننا نروح ونصور برا مصر علشان نطلع بجودة كويسة، لأ ممكن تتعمل أعمال زيّ هوليوود وتطلع على مستوى جيد من الإتقان بس لو توفرت الإمكانيات. والموسيقى التصويرية اللي ليها دور كبير في نقل حالات المسلسلات والمشاهد.
أعماله دايمًا بتبقى مربوطة بمتعة وده نادرًا لما بيحصل مع أعمال عربية من النوع ده واللي في الغالب ممكن تقلب مع الناس بضحك وتريقة، ده غير إن الأعمال دي بتقدر كل سنة في رمضان وفي وسط كل زحمة كل المسلسلات إنها تبقى تريند وحديث السوشيال ميديا حتى قبل عرضها، نزول التريلر وبوستر العمل بيبقوا تريند لوحدهم قبل حتى ما الناس تشوف أول حلقة.
ومانقدرش ننسى نهاياته اللي بيقفل بيها أي مسلسل واللي دايمًا بتبقى غير متوقعة، ده غير الحبكة المعقدة والتحولات الدرامية زيّ ما شوفنا في مسلسل لعبة إبليس، واللي كان بسببه أول مرة نسمع كلمة “شابوه” على عمل درامي في رمضان ومن بعدها توالت الشابوهات على يوسف الشريف وعلى أي عمل فني بيقدم قيمة للمشاهد.