النهارده 13 يناير، عيد ميلاد الفنانة التونسية دُرة أيقونة الجمال والأناقة، اللي قدرت تلبس عباية الست المصرية وبجدارة خلال السنين اللي فاتت في أعمالها، واللي كمان دايمًا معروف عنها إنها بتخطف الأنظار في أي مهرجان أو أي مكان تتواجد فيه، لأناقتها شكلًا وكمان مضمونًا.. ده غير الأعمال الكتير اللي عملتها في وقت قصير، اللي قدرت بيهم تثبت موهبتها ونفسها كفنانة من العيار التقيل.. بما إن النهارده عيد ميلادها، فقررنا نحتفل بيها بطريقتنا الخاصة، بإننا نفتكر أهم أعمالها الفنية وكمان أبرز إطلالتها في المهرجانات المختلفة.
الأعمال الفنية
مسلسل الخروج
من قدرات دُرة الخاصة، هي إنها بتختار الأعمال اللي بتعمل ضجة وقت عرضها وبتلاقي استحسان الجمهور، ومن الأعمال دي كان مسلسل الخروج، اللي ظهرت فيه كبطلة مع ظافر العابدين، وقدرت دُرة تنجح المسلسل من خلال إتقانها للدور وتمثيلها بصدق.
مسلسل العار
نجحت دُرة إنها تقدم شخصية “سماح” أو “روقا” المُقتبسة من فيلم العار باحترافية شديدة، خلت الكل يصدقها ويقتنع بيها في دور البنت الغلبانة اللي تحت طوع جوزها وقلبها الطيب بيخليها تبقى مُخلصة ليه وتقدمله كل حاجة هو عايزها، حتى لو ده هيبقى على حساب نفسها، وكرامتها، وكمان حياتها.
مسلسل سجن النسا
المسلسل ده كان مكتسح وقت عرضه في موسم رمضان، لإن العمل كان فيه كل مقومات المسلسل الناجح، اللي كان منها الـ cast الكبير اللي جمع بين نجوم كبار. وقدرت دُرة إنها تبهر الجمهور العربي وكمان النقاد، بأدائها العظيم وهي بتقدم شخصية دلال، البنت الغلبانة، اللي اضطرت تبيع نفسها، مش علشان بتدور على الإغراء والشهرة، ولكن علشان كانت بتحلم بحياة أفضل ليها ولأختها، في محاولة منها للتخلص من حياة الفقر مهما كان التمن.. وأشاد كتير من النقاد بدورها في المسلسل اللي قدر يخرج كل مواهبها وتظهر للجمهور من خلال الشخصية اللي قدمتها في المسلسل لدرجة خلت بعض النقاد يقولوا إن ده ممكن يكون أهم دور قدمته الفنانة التونسية خلال مشوارها الفني كله.
اقرا كمان: الجميلة دُرة وكلامها عن الحب الحقيقي بعد عقد قرانها.
مسلسل نصيبي وقسمتك
مش قولنالكم إن دُرة دايمًا بتبقى جزء مهم من أي أعمال بتعمل ضجة وبتسيب صدى وقت عرضها؟ المسلسل الشهير نصيبي وقسمتك، اللي ابتدى من سنة 2016 ومكمل لحد دلوقتي، كانت دُرة من أوائل اللي اشتركوا فيه في بعض القصص من الجزء الأول من المسلسل، وأي حكاية كانت هي بطلتها، كنا بنبقى متأكدين من قبل ما نتفرج إنهم هيبقوا من أفضل الحلقات.. وطلع ظننا في محله!
فيلم كلاشنكوف
كلاشنكوف كان من أوائل الأفلام المصرية اللي قدمتها دُرة سنة 2008، وبرغم من إنها ماكنتش بطلة العمل، ولكن دورها كان محوري ومهم جدًا في الفيلم، وقدرت بتمثيلها المتقن إنها تلفت الأنظار ليها، وكمان خلت الجمهور يتعاطف مع شخصيتها في الفيلم.
فيلم تصبح على خير
ظهرت الفنانة التونسية في فيلم تصبح على خير بشكل ودور مختلف اللي كان بيميل للكوميدي، والفيلم كان الموود العام بتاعه خفيف ولطيف بسبب الأحداث الكوميدية اللي كنا بنشوفها في المسلسل، واللي كانت دُرة عنصر أساسي فيهم.
مسلسل الشارع اللي ورانا
نوع المسلسل ده كان بيعتبر جديد ومش شائع في الدراما المصرية لإنه كان بينتمي لنوع الرعب والتشويق، اللي مش كتير بنشوفه في الدراما المصرية.. وقدرت دُرة على الرغم من تحدي تقديم نوع مختلف من الأعمال الدرامية، إنها تبدع في الأداء وتشد الناس إنها تقعد وتتفرج على الأحداث.
مسلسل إلا أنا
المسلسل اللي بيعتبر حديث السوشيال ميديا السنة دي، ظهرت فيه دُرة في حكاية “من أول السطر”، وعلى الرغم من وجود بعض الانتقادات اللي اتوجهت ليها من حيث أدائها في التمثيل (على عكس الطبيعي)، ولكن ده مايمنعش إن المسلسل ده من أهم الأعمال اللي قدمتها في مسيرتها.
