مش عارفين لحد امتى هنفضل ننقل حوادث مفجعة بتحصل للستات.. في الفترة الأخيرة شوفنا جرائم بشعة في حق الستات، من تحرش وابتزاز لتعنيف أسري وقتل. ورغم كل الجهود اللي بتقوم بيها كل الناس والدولة في محاولة رفع الوعي وتشديد العقوبات على المجرمين علشان يكونوا عبرة لغيرهم، ولكن برضه لسه في ناس بترتكب جرائم وبدم بارد.
امبارح السوشيال ميديا اتقلبت بعد ما تم تداول خبر مقتل ست اسمها مريم وابنها في المنيا. مفيش شيء مؤكد لحد دلوقتي بس الحكاية اللي بيتم تداولها على السوشيال ميديا هو إن سواق التوك توك كان بيتحرش بالست وهي ماشية في الشارع مع ابنها وبنتها، وبعد ما عنفته مريم وهددته إنها هتتقدم ببلاغ، راح مطلع ساطور ودبحها هي وابنها، وبعدين هرب! من وقت الحادثة ورواد السوشيال ميديا بيتداولوا تويتات عن الموضوع وعبروا عن غضبهم وصدمتهم من اللي حصل، على أمل إن يتم القبض على الجاني في أسرع وقت.
وقدام حادثة القتل دي، وقفنا في صدمة وفكرنا في أسئلة كتير.. هو إزاي دفاعها عن نفسها، في حالة إنه كان بيتم التحرش بيها، يستفزه لدرجة إنه يقرر يقتلها، إزاي واحد زيّ ده يبقى معاه ساطور ماشي بيه في الشارع عادي كده.. وإزاي يدبح أم وطفلها في وضح النهار وقدام الناس كأنه أمر طبيعي!
وكثفت الأجهزة الأمنية بمحافظة المنيا من جهودها علشان تقبض على المتهم ومحاولة كشف حقيقة اللي حصل وملابسات الحادثة، فتم تشكيل فريق بحث تحت إشراف اللواء محمود خليل مدير أمن المنيا للتحقيق في اللي حصل والقبض على المجرم.