النهارده عيد ميلاد الفنان العظيم الراحل أحمد زكي، فهو اتولد في نفس اليوم من سنة 1949 في مدينة الزقازيق بمصر، ودرس في المعهد العالي للفنون بقسم التمثيل والإخراج، وهو ممثل ومنتج، ويعتبر واحد من أعظم الممثلين اللي عدوا على تاريخ السينما المصرية، وأطلقوا عليه “إمبراطور السينما المصرية”.
شارك أحمد زكي في أكتر من 60 فيلم، وفي ستة منهم موجودين في قايمة أحسن 100 فيلم مصري وهما: “البرئ”، و”زوجة رجل مهم”، و”الحب فوق هضبة الهرم”، و”إسكندرية ليه”، و”أحلام هند وكاميليا”، و”أبناء الصمت”. وكسب جوايز كتير واتكرم في مهرجانات كتيرة زيّ مهرجان القاهرة السينمائي سنة 1990، ومهرجان الأسكندرية في سنة 1989.. وكمان ليه أعمال كتيرة في مجال المسرح كلنا بنحبها، ومن أهمهم مسرحية :العيال كبرت”، و”مدرسة المشاغبين”، ومن مسلسلاته: “الأيام”، و”هو وهي”.
وشارك في أعمال تانية كتيرة مهمة زيّ “شفيقة ومتولي”، و”ناصر 56″، و”أيام السادات”، و”حليم”، و”إستاكوزا”، و”اضحك الصورة تطلع حلوة”، و”النمر الأسود”، و”الراقصة والطبال”، و”معالي الوزير”، و”كابوريا”.
وتوفى أحمد زكي في 27 مارس من سنة 2005 في القاهرة بعد ما فضل يحارب سرطان الرئة فترة كبيرة، والنهارده في عيد ميلاده الـ 71، جوجل احتفلت بيه وحطت صورته على محرك البحث.
